一連18場於紅館舉行的張敬軒《The Next 20》演唱會，昨晚進入第二場， 軒仔跟觀眾一起過了一個核爆式歡樂倒數迎聖誕，他更送上聖誕大禮，安歌二次，揚言當尾場做，讓觀眾十分難忘。平安夜，為跟歌迷歡度聖誕，大會刻意晚上九點半才開始，待大家可以凌晨一起倒數，軒仔不單換上搶包山款式熊仔聖誕樹新衫出場大唱洗腦聖誕歌，更請來樂壇新寵林家謙為嘉賓，全館整晚不停發出核爆式歡呼聲，歡樂滿堂。
家謙出場，先是與軒仔合唱《追風箏的孩子》，繼而再跟觀眾打招呼，軒仔隨即叫家謙 : 「你除耳機聽下大家比你嘅核爆式歡呼聲…..」軒仔形容家謙係一個好特別好特別嘅人，「佢好得意，我咁多年開音樂會、 開演唱會，未見過有一位嘉賓，咁唔話得 ，我地將綵排錄音send俾佢，佢竟然唱返一個編埋和音版俾我 ！」家謙就話：「咁樣做係希望成為呢個演唱會獨有版本，希望大家喜歡呢個版本，每次不同先好玩 。」
軒仔又表示最初認識家謙是在商台，當時大家同電梯，有身邊朋友指他們兩人好似樣，當時不以為意，但今次於舞台上面對面合唱真的有照鏡感覺。他直言，家謙這兩年有好成績，非常戥對方開心，唱片賣斷市，係時侯要開紅館。家謙就謙稱：「多得你提攜。」軒仔接話：「唔好咁講！係黃金就一定會發光！呢行好公道嘅！」觀眾即送上無盡掌聲。
家謙指在平安夜做嘉賓，目的想送聖誕禮物給軒仔，隨即把禮物帶上台，軒仔即場拆禮物，家謙笑着說：「唔駛驚，正經嘢嚟。」禮盒打開後，發現原來是果醬：「我見你咁悽涼，成日食白麵包，前幾日去買俾你嘅，不過呢幾樽嘢有少少似你最近啲建築材料，有名堂㗎，呢樽係開心果，呢樽叫糊塗（胡桃）呀！你記住分開，唔好撈埋，好神奇嘅，有說明書教你點食㗎啦，每日三次每次兩匙…….」引得觀眾哈哈大笑。軒仔開心表示，沒有想到自己的早餐會多了一份愛的滋潤，「雖然樽嘢顏色唔係咁開胃，不過唔緊要啦，食落去最尾出來顏色都係差唔多， 哈哈。」
一場來到，家謙沒理由唱半隻歌就走，到他獨唱部份，他死拉軒仔不放，「你唔好交個台俾我，唔好，太多人啦，我唔慣一個人係個stage到呀。唔好走啦….唔好係咁先啦…..你試吓走，我同你一齊走㗎！」軒仔：「你搞咩講到咁曖昧，哈哈….你知道㗎，你要咩我都應承你㗎….」家謙即搞笑回答：「我要樓啦….我要…」又再引發笑聲，接着由軒仔陪着他獨唱《難道喜歡處女座》。
來到安歌環節，快將踏入聖誕節，軒仔先是升上台唱了 《只是太愛你》然後又降下去，叫場館關燈，台底聽到他喊話：「有禮物要送俾大家，以住大家聖誕節都係去買禮物，今年我準備咗一件搶包新衫俾大家！」再升上來時見到他已換了一件嫌如一座包山的服裝，由無數bear bear 熊仔砌出聖誕樹形，非常可愛，隨即又再引發核歡呼。最意想不到是，嘉賓林家謙竟然未走，又再重新上台，與軒仔及觀眾一起開心倒數萬眾歡騰的聖誕節，又齊齊唱改篇的YUU及DONKI聖誕洗腦歌，令現場每一位都開心到飛起。
唱完歌，軒仔話: 「家謙你準備咗份禮物比我，我都準備咗份比你」，接著招手叫他站在自己面前幫忙除衫，「你過來拆禮物啦，你係中間伸隻手入去就得啦。」引得觀眾不停狂叫。昨晚倒數安歌過後，歌迷並不肯離去，不停呼喚軒公，結果軒仔再送大禮，升回台面，跟大家說：「今日真係當尾場咁做，唔會令你平安夜失望！」繼而送上《百年樹木》及《老了十歲》》，演唱會才真正美滿完結。
