今年4月1日是張國榮（哥哥）逝世18周年，鄭丹瑞（阿旦）的網上平台「健康旦」，將於當天舉辦《想你張國榮》音樂會。早前阿旦邀請一班哥迷分享哥哥的珍貴回憶，而1987年哥迷聚會，當年由阿旦擔任司儀，哥迷向旦哥贈送一張阿旦與哥哥同場的照片，讓阿旦感動落淚，「呢張相搞到我好激動，好多謝。」
當中自稱是「張太」的粉絲展示一張1985年與哥哥拍的「婚紗照」。相中的哥哥身穿白色禮服，而哥迷則挽着他的手合照。粉絲憶述道：「呢張相係我同Leslie（張國榮）嘅緣份，當時1985年張國榮推出一張大碟《為你鍾情》，無綫《勁歌金曲》有一個抽獎活動，寄信去有10個女仔可以同哥哥影婚紗相，我好榮幸係其中一個，就成為咗有相為證嘅『張太』，嗰陣時仲喺廣播道77號影。」粉絲笑指能與哥哥影婚紗相，如同已經出嫁，不用再嫁。
而另一名哥迷分享哥哥《霸王別姬》造型的照片，她1992年和其他哥迷組團到北京探哥哥班，「哥哥有招呼我哋，電影公司安排我哋當晚去片場睇拍攝，有喺酒店同哥哥食飯，當晚哥哥拍『貴妃醉酒』，佢助手用相機拍低造型，哥哥好驕傲話畀我哋聽，佢拍卧魚動作時，本來用替身，但最終自己做咗，佢好開心、驕傲，我哋要求哥哥曬相送畀我哋，哥哥喺我哋多番要求下只應承曬一張，最終翌日每人送兩張寫上歌迷名字嘅造型照畀我哋。哥哥對我哋好好，叫助手買可樂畀我哋飲，又叫我哋喺街唔好亂食嘢，又叫我哋頭暈身㷫記得揾佢，佢帶咗好多備用藥。」