張敬軒《The Next 20》演唱會來到第9場，昨晚（2日）軒仔請來剛剛新鮮出爐新力軍男歌手金獎MC張天賦為嘉賓，令觀眾歡呼四起。
邀請MC出來前，軒仔謂自己坐係樂壇關愛座，最開心見到一班新血，「自己做過新人，我都係當年既得利益者，一步步進步，來到不同位置，係多得好多前輩比機會我，今日自己身為前浪，都有責任營造一個良好樂壇生態同良好新陳代謝俾樂壇。今年我地見到好多優質偶像，優質創作人音樂人，今日呢位人兄兩樣原素都有，佢可以話係『實偶派』。好榮幸請到佢來，呢大半年來我成日loop佢D歌。」現現場響起《反對無效》，觀眾即歡呼四起，MC出場同軒仔合唱。
合唱完畢，MC指住自己個西裝口袋，先發現佢用左隻公仔來扮袋巾，「聽講呢幾日上你個台都有交換禮物，我剛剛係後台聖誕樹上面見到呢隻野，好得意，火雞？係你個姐姐悉心幫你整早餐….」軒仔笑道，「你個人都幾客氣喎！攞人啲嘢叫人送俾你….呢隻野生前係姐姐個早餐擺盤裝飾。既然你鐘意，我同你介紹番，呢隻野係有名堂，佢個名叫：鵰！你企中間！」語出即引爆笑聲，MC笑住反問「鵰….你企中間？」軒仔就整古佢再反問，「你同我講呀？哈哈哈….」
及後軒仔又解釋，呢隻大名頂頂的「雕！你企中間！」，改呢個名係有寓意，「我地無論做音樂、做人都要搵到自信，無論任何處景，都堅持自己信念企定係中間，努力做自己音樂，就一定有人賞識。」繼而叫攝影師過來，話要影番張頒贈「雕」儀式合照留念。引得觀眾又再哈哈大笑，非常搞鬼。
輪到MC獨唱，佢揀咗「記憶棉」，重同大家好開心咁講，「新年第二日，今年有幸得到新人獎，第二日就企上紅館個台唱歌送俾大家！真係好開心，你地啲燈好靚呀！」