姜濤重新演繹張國榮（哥哥）經典名曲《追》是由徐浩擔任監製，並與黃兆銘共同編曲，在保留原作韻味同時注入新元素。他坦言雖然之前在演唱會演繹過這歌一次，但今次重新編曲，是需要邊唱邊找感覺。他說：「好彩比想像中順利，首先隻歌嘅range比較啱我，同埋同監製好熟，冇太多阻滯。本身預兩日錄，變咗一日就搞掂。」
姜濤直言唱得很舒服，他也有聽回哥哥原版演繹，但他說：「到重新去唱、編排過嘅時候，一定要有自己風格、唱法加落去，太依賴會俾人覺得太模仿，唔想俾人覺得係模仿，因為哥哥係模仿唔到。」
至於對哥哥的印象，姜濤表示從小已經由媽媽和親戚口中聽到過張國榮的名字，亦由細到大都聽他們播《追》這歌。「我有睇哥哥以前一啲訪問，會感覺到佢好放鬆，係好自信嘅一個人。」電影《家有囍事》哥哥的角色，及與梅姐（梅艷芳）合作的《胭脂扣》，他都覺得很好看，並指很少藝人可以將唱歌和演戲都做得好好。
除了唱功和演技外，姜濤亦非常欣賞哥哥風趣幽默的性格：「我哋依家做訪問多少都會有啲拘謹，可能人生閱歷未夠，好多人都有睇過哥哥《今夜不設防》嘅訪問，佢重新定義咗咩係Charm，唔會淨係鏡頭前一張相，而係你個談吐、氣質。依家啲節目唔會俾你食住煙去傾偈，但佢可以好Chill，嗰個年代嘅Artist嘅人格魅力係更加突出，哥哥係再突出嘅一位。」
