姜濤今午（11日）現身商台接受鄭裕玲（Do姐）主持的節目訪問，Do姐先問姜濤身體狀况，姜濤說：「好好，我知道好多人擔心我隻腳，會Keep住做好多康復訓練，大家唔使擔心。」姜濤透露腳傷是舊患，早在入行前到台灣打交流賽時整斷韌帶，但一直沒醫，「嗰次籃球賽之後，我都冇駁返韌帶，冇辦法，因為康復時間好耐，商量過要6至9個月，我冇咁多時間，唯有清晒啲碎骨出嚟。」他表示現在每一次跳完舞就做衝擊波，希望將來有時間駁回韌帶。
除關心姜濤腳傷外，Do姐也追問其現時心情如何？姜濤說：「覺得呢行原來風水真係幾靈，我以前冇乜太留意。（你相信？）我𠵱家信，我由今年開始，犯太歲犯得好應，一嚟受傷，二嚟有各種是是非非，都應該係有史以來最多一次。」Do姐以自身經歷開解姜濤，指完全因為當工作成功就會有很多人留意。姜濤續說：「報道點樣講我都唔緊要，講到屋企人及身邊工作人員，會影響到人哋，就覺得好對唔住大家，入咗行某方面我係預咗咁，我覺得人工包嘅，但有時無辜嘅人，俾一啲冇嘅事情影響到，我會有啲內疚。（傳有女朋友？）由我啱啱入行嗰陣，佢係幫我手嘅工作人員，我同身邊每個工作人員都係咁相處，好多工作人員都知道，可能因為人哋生靚啲、高啲……我會覺得影響到人哋生活，呢啲生活係人哋，唔係做我一個，可能人哋仲有其他工作，我就會好內疚。」
Do姐續說：「工作時間咁長，對幕後工作人員都係好長，呢班人同你好Close，會多傾偈，畀人攞咗嚟做新聞？」姜濤聞言說：「其實好多都係公眾場合，我唔怕我做啲乜嘢，你哋有時可能影呀﹑傳呀，我覺得冇嘅就唔會驚，但我𠵱家都會知道，身為公眾人物，可能要收埋自己。（以後對工作人員如何？）惟有多啲注意，都係嗰句，我份人工包嘅，其實做藝人某方面冇私生活可言，我知呢個道理，自己各方面再進步啲。」
Do姐問姜濤現在究竟是否開心？姜濤直言：「OK啦，一般，唔可以呃大家話今年會好開心，但會朝開心方向。我聽粉絲講，有時作品之外，藝人人品都係追求原因，我會令自己保持正能量俾番佢哋，有時我會較負能量。我覺得呢一行係keep住學習課題，當係上天俾我嘅所有考驗。（迷信犯太歲？）我覺得好巧合，咁啱我屬兔。」
日前姜濤表示要暫別社交平台，專注演唱會，他說之前也試過，的確生活比較專心。至於個唱籌備情況，姜濤說：「OK呀，好多謝好多人幫我，冇諗過有一啲我好仰慕嘅人幫我。（例如？）大家知道佢幫我嘅話，大家都會好開心，好驚喜。（哪方面幫你？）舞蹈方面，佢係大師級，幫我做成個編排。（你開口要求？）嗯，開頭佢都唔得閒，之後佢都好好哋抽咗啲時間幫我，好完美地Match成件事。」
Do姐訪問途中突然發現，姜濤只穿黑色恤衫受訪，也是Do姐認識姜濤多年衣著最單薄一次，姜濤為免每次訪問都著得太隆重，今日跟服裝師爭拗了一輪，由早上拗到現在，自覺入行至今已知什麼場合和狀態下最舒服，天氣太熱難穿長褸等厚重衣物，自己舒服最重要，故往後下來的生活及打扮，都想有自己想法。
Do姐續問姜濤體重是否他的長期煩惱？姜濤說：「以前肥仔底，加埋可能之前受傷後，有一排冇運動，自己好有壓力，係咁食嘢。（飲水都肥？）你見我杯水都冇飲過。（怎麼辦？）惟有努力，冇借口。（不要不開心，因為不開心就會吃？）都係，但𠵱家漸漸地唔開心程度，令我連嘢都唔想食，以前稍為食嘢會開心啲。（受人影響？）冇辦法，做呢行。媽咪都話總之做呢行，要多謝攻擊及讚我嘅人。」