由姜卓文（細John）、林宣妤（Serene）與蘇子情（Gabriella）主演 ，知名文化人胡恩威擔任導演的舞台劇《香港生死書》正在文化中心公演，昨晚（9日）舉行第三場，細John父母姜大衛（John哥）和李琳琳現身捧場。
欣賞完細John的演出，John哥都忍不住讚兒子：「好難得！做戲、唱歌、跳舞，同舞台劇完全唔同，當中以舞台劇係最難，因為無得NG，我覺得佢都做得幾好！」23歲就成為影帝的John哥，原來對舞台劇有一定的恐懼感，John哥說：「我都有做過舞台劇，做過三、四次，自己都有恐懼，每次做完都會大病一場，因為壓力太大，大過拍電影好多好多，所以我都估唔到佢（細John）承受到，始終舞台劇好考人，佢做得OK啦，等佢慢慢去感受當中的樂趣。」
對細John第一次演舞台劇的評分？John哥：「合格以上啦，好難比100分！」細John笑說：「同我讀書成績差唔多，都係合格以上！」而John哥亦讚Serene和Gabriella等演員，好用心去做好這個舞台劇；琳琳姐亦見證了兒子的轉變，「睇到佢喺屋企好用心，每日熟讀自己的對白，以前佢做嘢無咁肉緊，今次真係好努力，希望會有更好的成績。」細John和應媽咪：「我做嘢一向都咁肉緊㗎！」
爸媽在台下是否很大壓力？細John說：「其實第一場係最緊張，因為未知觀眾的反應係點，雖然練到好熟，但都擔心會有甩碌情況，第二場就開始放鬆，今日第三場知道觀眾當中會有屋企人，有親朋戚友，出場之前我真係緊張，個心卜卜聲咁跳，但唔係『怯』那種緊張，係想比個Good Show大家睇，自己都好期待呢一晚演出。」
對於演出，細John表示可以做得更加好，「每日的綵排到正式演出，我都學到好多新嘢，有新的進步和新的進展，希望尾場可以做得最好。」琳琳姐和John哥透露之後會再來捧場，「希望之後再睇時，細John會比今日更加成熟同進步。」