新冠肺炎疫情嚴峻，第五波疫情持續爆發，確診數字不斷上升。近日娛樂圈不少藝人或DJ先後確診新冠病毒，包括劉翁﹑《十八樓C座》4位播音員﹑林欣彤、ONE PROMISE成員Anton及C AllStar成員陳健安等。今天（21日）商台DJ麻利在社交網表示確診Omicron變種病毒，「我居然都中咗Omicron！瀨咗嘢！」
麻利表示自己沒有打針﹑沒有服用Panadol，只選擇用中藥，而病徵明顯兼好大幅度上落，「平時重感冒喉嚨痛係火燒感覺，但Omnicron嘅喉嚨痛，係你喉嚨俾𠝹刀𠝹傷咗咁痛，每吞一次口水就翻𠝹一次。係刀傷鋒利劇痛。終於有想食嘢嘅衝動，但只係衝動，因為好易攰。因為病毒品性濕寒，萬萬不能亂食嘢。例如餃子如果係白菜豬肉，有白菜死梗。我媽居然搵到韓國青瓜豬肉餃。但好難食，所以我都係煮通心粉。」
她又指：「應付Omnicron需要嘅係冷靜，停止獵巫、Focus on自己同身邊人，唔一定要食好多嘢、聆聽自己需要，瞓覺、瞓覺、瞓覺、熱檸檬水，維他命B/C/D/Zinc。繼續做隱士專心養好身體係本月重點，因為我每次重病喉嚨都好弱會咳好耐，咳就講唔到嘢，所以暫時有咩都係會叫暫停先。大家都要保重身體啊。」
對於麻利確診Omicron，商台回覆時表示已經即時安排清潔和消毒有關工作地點，「本台主持麻利亞初步確診，最後上班日期為2月14日，工作期間均有佩戴口罩。為安全起見及專業醫生意見，本台已經即時安排清潔和消毒有關工作地點，相關節目的同事，由事發起七天進行自我家居隔離，每天盡量進行快速檢測，並且匯報檢測結果給公司，以麻利亞最後上班日期起計七天，即2月20日，只要《口水多過浪花》之團隊完成快速測試為陰性，已屬安全，2月21日便可如常上班。」
