馬德鐘、歐陽震華（Bobby）等今日為無綫新劇《伙記辦大事》宣傳，提到新劇口碑不俗，Bobby表示是大家功勞，他還指收視稍後還有機會上升，「現時有40點收視，預計之後有70點收視。」問及友台ViuTV來勢洶洶，作為TVB的「收視福將」Bobby反問：「仲有咩友台？我仲停留喺80年代嘅ATV。唔好畀啲無形枷鎖我，都係要睇表現，好似馬德鐘依家係視帝，佢都努力咗好多年。」他直言最初是有意飾演Joe亦正亦邪的角色，「監製話你都係做正派，你做反派好多人會笑。」入行前曾是G4探員的馬神也有興趣交換角色，「有乜理由唔係我做G4。」他笑說入行以來卻未飾演過G4角色。
劇中馬神與年紀相差21年的陳瀅有感情線，「我冇諗呢樣嘢，我覺得OK，我哋唔係後生仔女嗰種激烈，而係細水長流。」Bobby笑稱與萬綺雯在劇中關係未有明確交代，形容雙方是閨密，又爆出現實中多閨密：「晚晚打畀我，全部都係唔開心先搵我，我好似聆聽者咁俾意見。我啲閨蜜太太全部都識，高矮肥瘦古靈精怪乜都有，所以太太好放心。」