呂爵安（Edan）首個個人演唱會於周日（27日）圓滿結束。演唱會後，他面對不少批評，有指他未夠歌開騷兼恥笑隊友，又稱他是MIRROR成員中最多負評的演唱會。Edan之後在IG限時動態上載與網民對話的截圖，不過被批小家，有公審之嫌。他於昨日（29日）在IG撰長文反擊指，「只想讓大眾知道，做偶像做藝人每日會suffer啲乜嘢，「好多人就係藉住『偶像、藝人係唔應該反擊』呢條規則而為所欲為。而好多artist都因為呢條『潛規則』而選擇啞忍，殊不知內心已經千瘡百孔！甚至有情緒病…」
Edan表示自己心臟算強大，情緒都算比大部分人穩定。「但當我發現連我都會被呢啲嘢牽動情緒嘅時候，我想嘗試去做少少嘢，想嘗試去改變少少嘢。我唔認同做藝人就要啞忍就要硬食，我相信只要你唔係發脾氣，你有道理，你有禮貌地表達，總有明白事理嘅人係會明白你，係會支持你。」他希望Haters將心比己，「你哋做緊嘅嘢，係同樣地有人會對你偶像咁樣做，而佢哋亦都會受困擾，我相信你哋都唔會想佢哋suffer。所以，己所不欲，勿施於人。希望大家可以將心比己，其實無仇無怨，冇必要製造咁多負面嘅情緒，呢啲完全係vicious cycle（惡性循環）。」Edan指自己一向接受別人理性而坦白嘅意見，「好唔好睇，好唔好聽，好唔好笑，完全係base on個人喜好，鹹魚青菜，各有所好，唔鍾意係完全冇問題，我亦都好樂意接受。如果係直接msg我一啲人身攻擊，完全扭曲我原意嘅嘢，我就真係想講句『有心啦』！」
Edan的貼文隨即獲得不少圈中人和粉絲留言力撐，唔少粉絲大讚Edan「有文有路，講嘢公道」、「反駁得有Point」、「善意批評可以接受，但惡意中傷真係不能啞忍。欣賞你有氣度地表達」。
相片來源：呂爵安@Instagram
