呂爵安（Edan）近日正忙於為即將舉行的個唱排練，仍抽空製作了兩首全新歌曲，並先後在這兩日推出。打頭陣的《Again!》找來《膠戰》好友岑珈其、徐浩昌（肥腸）及黃正宜（阿正）一同拍攝MV，實行演唱會未開，先送上驚喜與笑彈！
新歌是一首好溫暖的歌，Edan說：「做人開心唔係咁簡單，但呢個世界好多人都陪住你，好多嘢可以重新嚟過，一齊去努力令到件事變得更加好，所以想用呢首歌帶啲正能量鼓勵大家，話俾大家知，好多人陪住你哋㗎！」每個人人生裏總有不如意的事，但Edan相信只要有信念，知道身邊有人陪伴在側，就有力量一同邁步跨過去，他很希望借助新歌感染大家，傳達正面的思想。
歌曲雖然看似沉重又帶點深奧，但MV卻是截然不同的風格，而且更突出了Edan的搞笑形象。Edan說：「MV想用一種輕鬆少少嘅方式表達，所以同導演講不如玩啲搞笑啲嘅嘢啦，因為一直以嚟嘅MV，都冇乜邊隻MV可以好搞笑好瘋狂，所以今次度咗呢個MV故仔我好鍾意！」要拍出瘋狂搞笑Mode，當然要合適的演員加盟，而且未演就要先令大家發笑，正是6膠無疑。
Edan說：「因為拍《膠戰》以外，都冇乜機會同佢哋合作，可以搵佢哋一齊玩，所以好正。同埋咁啱今次準備緊演唱會，我可以掉晒俾佢哋做下，我對佢哋嘅演出都好有信心，咁我就輕鬆啲，令到今次係我拍攝時間最短嘅一次嘅MV。」既然要拍攝一個瘋狂嘅MV故事，造型上當然不能隨便，結果珈其、阿正同肥腸的造型都為大家帶來驚喜，Edan表示這要歸功於一眾幕後人員。
Edan道：「我哋花咗好多心思喺佢哋嘅造型，特別係一諗起阿正做奸角，就覺得要俾粒墨佢，結果成個造型都好襯佢，係Perfect Match，其實佢間唔中出show都可以試下咁做，好啱佢Punk Rock嘅形象。肥腸直情突顯佢嘅優點出嚟，好吸睛，一定會望住佢。珈其整埋個頭，好啱佢MK年代，將佢哋3個嘅優點放大，所以我相信佢哋都好滿意！」
至於Edan扮演精靈，早前他在社交平台Share時已引起廣泛討論，他自己都感激幕後製作團隊為他精心設計造型，拍攝逾兩小時，但黐假耳仔卻用了6小時，感覺整件事很有心思。
