TVB的劇集《神耆小子》中洪玫瑰（樊亦敏 飾）與「小鮮肉」孫正傑（吳子冲 飾）有「姦情」，兩人最吸睛是吳子冲「赤裸粉紅」，網民更指他是「除衫擔當」，吳子冲與樊亦敏今日出席宣傳活動時，被問到姦情一幕，吳子冲表示為除衫密密操練，「監製安排得好好，將除衫戲排到最後先拍，有時候俾我操練一下，由收到劇本知道要除衫，我都開始用168飲食方法，同一星期做六日gym，當時戒口都好辛苦，但戒戒吓都習慣，對食物都無咩感覺。」赤裸太過粉紅，引來話題，「係呀，我都唔知點解電視畫面拍出嚟會咁紅潤，拍時完全無搽任何顏色，最多只係腹肌打陰影，所以連我阿爸睇完都問我點解會咁粉紅，叫我除衫俾佢睇，咁我當然有除俾佢睇啦！」
樊亦敏笑言全劇最有艷福，除了與鄭則士有感情戲，又與吳子冲有姦情，「劇情需要，其實我都唔係咁渴求，雖然我曾經喺綜藝節目中有講過，我入行至今都間接咀咗好多帥哥，連曾志偉都話我以後唔使加人工，但我都係寧願揀加人工，每次重點都係因為劇情需要，大家要搞清楚。」
