陳奕迅新歌《人啊人》MV，於演唱會前一日終於發放！ MV由金像獎新晉導演陳健朗執導，大膽用一個人瀕死的第三觀視覺，告訴大家什麼是「人」，「人」又應何去何從？帶出反正你我一樣，終有一日灰飛煙滅，又何必再有執念。
據知Eason MV 今次用了超多CG及試驗性的特技，導演陳健朗開場用了一個白色山丘沙漠的荒無畫面，陳健朗表示，「畫面是想表達一個人瀕死期間的經歷，部分研究表示，人死後仍可有時間回顧一下整個世界，所以我們大膽幻想，當你離開肉身成為另一種存在時，用第三身看人生又是什麼？」
原來MV畫面之中，我們見到的是脫離肉體後的Eason通往其他次元的門，穿梭在多維度宇宙之間，舞者聚成之眾生曼陀羅、面容破碎後第三眼引爆之七色能量流動場，畫面到最後用全白來告訴大家，生到死在這一念，影像和意境都非常厲害。
今次《人啊人》由林家謙作曲、周耀輝填詞、李榮浩編曲，Eason直言收到林家謙demo時，已經非常喜歡這首歌，因為家謙在demo裏唱了一句：「Who we are？」 ，令Eason想到「人」這個題材，「我同耀輝講咗個構想，佢馬上就寫咗份非常出色嘅歌詞俾我，佢喺歌詞裏面不停問問題，但沒有結論，結論正好留俾聽歌嘅人去思考。」
MV用了近20小時拍攝，由早上9點拍到凌晨近3點才收工，單是吊威也，一吊就吊了三個鐘，Eason坦言有點腦沖血見暈，更笑言，「其實我唔知拍緊咩！好耐冇試過咁拍MV，不過我信導演！哈哈。我同阿朗傾過幾次偈，佢個腦好闊同好多唔同諗法，好創新，所以我交晒俾佢，佢叫我做咩就做咩。」
Eason更說：「吊威也其實都辛苦，唔係講吊得耐唔耐時間，係因為我始終冇受過訓練，核心肌群core muscle唔夠力，好多動作，都係靠核心肌群發力，所以我成日喺半空中就自動後空翻，hold唔到好耐。好彩今次班武指，都係以前拍戲、演唱會合作過晒，佢哋好好，不停教我應該點做，最終都拍到導演收貨要嘅鏡頭。」
今次Eason的MV有好多新嘗試，繼吊威也，又被整個人淋黑漿，又需與大班舞者跳舞。Eason說，「淋落嚟嘅係似芝麻糊混合類似小朋友玩嗰種口水膠質感東西，導演話食得嘅，哈哈。因為一淋咗就冇晒妝頭，所以呢部分放到半夜先拍，淋咗一共四、五次，剩係覺得凍，同自己好似變咗條鱷魚，因為黑漿流咗入眼晴，好似有層霧咁，似鱷魚眼睛灰灰地，但都幾好玩，我睇相個效果都震憾。」
演唱會即於明晚開鑼，Eason表示早已排練一段日子，「我提早咗排舞，想練多啲，當做埋運動囉。（會唔會嚴格閉關免生病？） 都會呀，臨近演唱會少啲出街囉，見到演唱會大家咁支持，啲飛賣得咁好，都有壓力㗎，演唱會始終係一件好大嘅事，有時我都會驚一驚，驚自己唔知做得好唔好，但每當呢啲時刻，個天就會派人嚟鼓勵我，例如身邊朋友，或者喺街上面都有好多鼓勵，行過撞到就會有人同我打招呼，然後話『你啲飛好難買呀！加油呀！』真係好溫暖。多謝大家，咁多人錫我，我會加油做好每一場。」