陳柏宇（Jason）即將在2月4日於亞博開騷，今次組成「陳柏宇feat.九龍搖擺俱樂部」期間限定組合，將歌曲重新編曲再演繹，配上40人管弦大樂團，近日正積極備戰。陳氏一家三口在過年前接受訪問，4歲囡囡Abigail難得坐定定，與父母齊齊畫大吉大利。陳柏宇說為了應付演唱會，農曆年都要閉關在家，不敢亂出街，以防中招搞到連騷都開唔到，雖然剛宣布30日開始解除隔離令，但都要萬事小心為上！
陳柏宇笑言，今年「逗唔到利市！」他說留在家當作叉足電，「閉關兩個禮拜，純粹係因為冇時間，因為我都要籌備演唱會，農曆年又真係驚見得太多人，如果你萬一唔覺意，農曆年時侯中咗，所有rehersal都去唔到喎，但係個騷又照做，我諗2月4號應該冇事！」老婆符曉薇（Leanne）就話：「休息多啲囉，我哋其實都比較外向型，成日帶個女周圍去，今年應該唔會周圍去，喺屋企休息下！」
佛系陳伯滿足現狀，講到兔年願望係咪想買樓？佢就話：「有錢咪買囉，有錢、有能力咪買囉，但係依家有好多使費呀，我又唔想困死自己，要喺呢幾年內買樓，當然如果有呢個能力，呢個係best-case scenario嚟嘅！」
化妝：Jessica Chan
髮型：Alex So@The Attic
服裝：YSL、Lane Crawford
造型：Kay Pang
場地提供：Studio Meta
