陳蕾（Panther）推出今年第二首主打歌《伸縮自如的愛》，又首次要求在MV中跳舞，令她大膽挑戰跳舞的，原來是之前被《全民造星V》的學員啟發，她說：「因為做咗《全民造星V》導師之後，睇住有某啲原本手腳唔係好協調嘅學員喺苦練之下都跳到，就俾咗啲動力令我覺得，呢班人都得，我係咪都可以呢？於是就膽粗粗同公司提議，不如我都試吓跳舞！」
今次除了有舞蹈員張立賢與Panther一起跳雙人舞，還有《全民造星V》的四位參賽者Tiger、Nathan、Kim、亨仔，她說：「因為佢哋真係咁啱本身擅長嗰種樂器，既然可能都要搵人去演繹返MV嘅彈奏部分，不如試吓搵年輕人或者係新認識嘅新朋友去參與MV啦，所以就搵咗佢哋四個去幫我一齊完成呢個MV。」
問到Panther花了多少時間學會這段舞，她表示：「其實我學嘅主要係兩段唔夠一分鐘嘅舞蹈，我上咗 5、6堂，覺得都幾好玩呀！排舞老師話house呢個舞種同我個性都幾符合，即係其實我都係一個活潑可愛開朗嘅人！」她說畢立即手舞足蹈，笑言：「我覺得點解我跳得好，就係因為我唔介意別人點睇我！同埋佢教我無論你跳成點，你個樣都要俾人覺得你好識跳！咁我覺得我係做到咗呢點嘅！所以實質跳成點我都唔係好知，但我覺得即係上咗 5、6堂嚟講我都呃得吓人嘅！」
其實Panther以前曾跟鄧小巧一起學跳舞，學的是風格比較有女人味和性感的New Jazz，「嘩！徹底擊潰咗我對跳舞呢一個技能嘅開發！上完之後我覺得我完全唔適合跳舞！」她這次接觸了比較有玩味氣氛的舞種，令她更加覺得只要找對舞種，每個人都可以跳舞，所以之後都想繼續嘗試去學。
這次拍MV成功將耍功夫和跳舞的技能解鎖，Panther透露下次要再挑戰其他新嘗試，「下次可能玩吓雜耍！我想挑戰玩吓嗰啲劍玉，可能我成個MV就喺度玩劍玉！其實我啲MV都好多嘗試吖，又打過乒乓波，又喺MV度打過機，又玩過game，仲有咩可以試呢‥‥‥可能約班friend一齊打邊爐又一個MV囉！都幾開心！」
