由林肯監製、一連五集的短劇《仁濟心》，以「抗疫福袋製作小組」日常為故事基礎，透過五個真實個案帶出「殘而不廢」等正面訊息，演員陣容包括袁偉豪、蔣家旻、錢嘉樂、韓馬利、文雪兒、吳家樂、寶珮如、董敬文、李紹堅、譚永浩（Jarryd）及曾淑雅（Jumbo）等。
今晚播出的第二個故事，真實人物原型為患有輕度智障的視障人士高嘉鴻。先天失明的嘉鴻，透過庇護工場及支援中心興趣班的幫助，克服自身缺陷開拓精彩人生，除成功增值及擴闊生活圈子，更發掘了對演藝的興趣，曾與余思霆及簡淑兒在慈善節目中表演跳唱《皆大歡喜》，帶出仁濟多年來致力推動殘疾人士增值及就業等相關服務。
負責飾演嘉鴻的，是之前憑《白色強人II》的精彩演出贏得不少關注的Jarryd，為了演好角色，事前做足功課，更挑戰全程閉眼演戲，他笑言：「要多謝監製林肯同埋導演，佢哋圍讀時好用心去tune我嘅語氣同節奏，我亦都參考咗《黃金花》嘅凌文龍，以及《一路瞳行》嘅惠英紅。為咗還原番真人，我全程要合埋眼演出，好多走位都要靠Jumbo同埋蔣家旻去帶住，用道具時要靠手感，變相好體會到視障人士嘅日常生活，會更容易投入到。」
Jarryd透過觀看嘉鴻的訪問片段，了解到對方內心的強大：「佢心思非常細密，好多時遇到難關都會鼓勵咗身邊嘅人先。我都好希望透過今次演繹，可以將我見到嘅呢份善良表達到俾觀眾。」Jarryd又感激袁偉豪讚他是劇集亮點：「佢仲話如果有一套關於呢個角色嘅劇俾我去演，有機會係我嘅代表作。」
Jumbo於劇中飾演Jarryd的家姊，坦言角色有很大挑戰：「我以前主要做開女朋友或者好開心嘅角色，今次呢個角色最大挑戰就係有啲苦情戲要處理。因為我不嬲俾人感覺都係開朗，同埋笑容燦爛。」Jumbo還透露遭監製林肯勒令練習「靚靚苦情樣」：「我自己都知自己有呢個問題，因為試鏡嘅時候，或者睇番自己拍嘅片，都望到自己表情會比較誇張啲，所以要多啲對鏡練習番一個上鏡少少、但又貼地嘅苦情樣。」