無綫劇集《七公主》今晚播出大結局，必睇位除了有長達十分鐘的劍擊比賽外，玩味十足兼極盡視覺震撼效果的結局位，亦絕對會成話題所在。
昨晚（11日）的劇情焦點落在黃翠如飾演的顧靈珊與心魔（陳曉華演飾）對決一幕！隨着靈珊壓力愈積愈多、精神狀態愈見虛弱，其心魔亦愈見猖狂；最終壓力爆煲的靈珊，遭心魔暴風式數落，被逼進死胡同的靈珊無法再強裝硬淨爆煲喪喊，並將壓抑已久的真心話盡情哭訴。該場接近5分鐘的場口情緒轉換相當頻密，難得翠如亦拿捏得宜，獲網民大讚演技有進步，且有不少網民直認對她改觀，「喊得幾好睇」、「佢依場崩潰戲做得幾好，起碼做到個感覺出嚟」、「我都有喊，呢Part可以」、「我之前都有留言話翠如演技唔掂，但呢場我覺得佢做得唔錯」、「翠如今集真係演技超晒班，做得好好」、「我喊咗，翠如苦盡甘來」、「翠如今集真係大平反，睇到我眼濕濕」、「翠如！這段做得好好，哭得好自然，帶動到我為你傷心，我都有喊。我很久沒有哭」、「好感動，有情緒病真係好慘」。
另靈珊最終會否被暖男小鮮肉Aden（吳子冲飾）打動亦是網民關注重點。在學界有「劍擊王子」之稱的子冲，本身擅長打佩劍，不過重劍及花劍亦難不倒他；加上身高高達187cm，樣貌又乖巧討好，故此演繹劇中暖男Aden角色更具說服力，令網民無限心心眼，「暖男小鮮肉角色向來都殺食，應該加大力度推啲小鮮肉上位啦，希望多啲監製用Aden」、「世界上係咪真係有啲咁好嘅男仔」、「睇完鍾意咗Aden，更加鍾意咗吳子冲」。
子冲劇中角色Aden是物理治療師，偶爾會為靈珊及靈珊母親按摩，有眼利網民留意到子冲的按摩手法相當專業，更建議無綫開拍以物理治療師為主題的劇集，捧子冲做男一，「Aden幾專業，可能有人真係認為佢係物理治療師。」、「Aden呢個物理治療師角色真係寫得好，睇咗套劇都學到少少物理治療。」、「TVB可唔可以開套劇以Aden呢個角色為主角，我想睇更多嘅物理治療，亦好好好好鍾意Aden呢個角色，希望Aden嘅精神可以延續落去。」
對於角色如此入屋，子冲受訪時坦言很開心：「Aden呢個角色係監製同編審一齊幫我塑造出嚟嘅，要多謝佢哋。我其實只係小暖男，因為鄭子誠先係大暖男！」子冲又指自己私底下亦算是暖男：「Aden將我嘅暖男特質不斷放大，然後將我嘅缺點全部抹走，佢比我多一份率直同單純。」其實劇中的按摩手法如此有板有眼，全靠飾演子冲同事、本身是專業物理治療師的林景程擔任顧問。