繼去年的《虎度門》後，Anson Kong@MIRROR（AK）今次夥拍另一位MIRROR成員Alton推出合唱歌《REBOUND》，用搞笑的方法大談身為偶像的自我修養，而MV中，AK與Alton身處Party之中玩到醉爆兼跳落泳池唱到濕身，轉頭又有超級跑車穿插畫面之間，令MV極盡視聽之娛，也為樂迷帶來連環驚喜。MV星光熠熠客串，包括MIRROR成員楊樂文和陳瑞輝、好友ONE PROMISE、Nowhere Boys、洪嘉豪、麗英、KB、陳穎欣、梁祖堯及徐浩等一同現身。
今次《REBOUND》由王雙駿作曲、Oscar填詞，Alton負責填寫Rap的部份。眾人是先做音樂底，所以AK與Alton一早已知編曲帶點Funk的味道，既澎湃又帶點跳脫好玩，於是乎Music Break部份Alton便建議跳Popping。Alton道：「本身Funk同Popping密不可分，所以我大膽提出。其實MIRROR《Ignited》都有呢種偏向，但團歌唔可以只顧一、兩個人嘅口味，今次兩個人貪玩啲，彈性又大啲，所以大家會見到我哋喺MV跳Popping。」
音樂與舞蹈方面都以好玩角度出發，MV自然也要夠Fun! AK與Alton於是便想到MV以Party呈現，並以倒敘形式講述AK與Alton醉爆醒來，忘卻前一晚發生何事，慢慢倒帶，才醒起開P玩到忘形更跳到泳池裡。
MV在2月期間拍攝，二人要落水拍攝，Alton笑言：「自從經歷拍攝電視劇《i.SWIM》後，2月落水都唔係咩新鮮事，入過少林寺就係入過少林寺，我冇問題呀！只要懷住一股勇氣，就可以解決所有問題。」至於AK則道：「我屋企個浴缸冇咁深，好難事先練習，夾硬都會解決到呢件事嘅！」在疫情嚴峻的日子裡，AK與Alton都希望瘋狂的MV情節為樂迷帶來點點歡樂，片刻忘憂。