王君馨（Grace）上個月推出新歌《Casada》，為了讓歌曲更完美， Grace參與作曲、填詞， 自資6位數拍攝MV。歌曲講述結婚，MV推出至今，點擊已逾30萬，更成功打入903歌曲榜第二位，港台中文歌曲龍虎榜第十位，成績斐然。
而Grace的老友王梓軒亦越洋支持，與她開ig直播。Grace指愛上拍MV，「拍《Casada》學多咗MV的攝影，燈光，舞蹈，拍攝過程，發覺自己對MV的拍攝真係有好大的興趣！嚟緊拍多幾個導演同camera man，有可能將會試吓做MV導演。」梓軒表示支持，並指稍後會找Grace初試牛刀。
Grace又分享拍攝過程，「因為黃昏好短暫，短shot拍完冇睇就要拍下一個鏡頭，如果時間許可，我可以再tune多少少眼神同咪嘴，咪嘴時嘴部動作要誇張啲！」梓軒說：「係㗎！唱緊歌同咪嘴個樣唔同，反而個口郁得大啲就似live。」Grace笑話：「一路roll機、一路跳緊舞、咪緊咀，攝影師亦會俾好多direction，例如：呢度要more shoulder、頭髮再flip一次，眼神再電我多啲、側邊啲人睇你拍MV以為你痴咗線，真係人都癲呀。」
五年前，兩人合作歌曲《隱型》，梓軒首次為Grace製歌，「我哋搵你嗰把聲嘅時候，你慣咗好girly，把聲好高好尖，但唱《隱型》時要你咬字清楚又有型，咁你今次點搵《Casada》把聲？」Grace表示：「今次唱出嚟想要有一把舒服嘅聲線，好似平時同老公傾偈咁，或者同老公撒嬌的時候，拍戲容易搵聲，因為唔同嘅角色會用唔同嘅聲線，但唱歌要慢慢去浸去搵一個屬於自己嘅聲音。」
