昨晚漢洋麥花臣場館舉行一連三日《友共情三十載演唱會》開鑼，不少好友如：張崇基、張崇德、小雪、方兆聰、譚嘉荃、陳嘉倩等擔任嘉賓，來捧場的圈中人也有不少，不過是日焦點不是漢洋有幾落力施展渾身解數，而是在壓軸表演嘉賓黎瑞恩出場後，漢洋公開已婚秘密，他在演唱會尾段，走到台下觀眾席拖了一名男孩上台，上到台隨即問男孩是不是剛瞓醒，男孩點頭承認，漢洋即投訴演唱會進行期間仍可瞓覺，男孩說:「我平時10點就瞓㗎嘛！」然後漢洋介紹男孩:「呢個係我個仔！」熒幕鏡頭來一個close up，兒子軒軒同漢洋餅印一樣，二人合唱了一首《You raise me up》，漢洋說:「仲有一個添呀！嗰個好惡，唔掂得。」原來他所指的是台下15歲的女兒芝芝。
演唱會完結後漢洋接受訪問時說：「一直無提過結婚，是因為自己都唔紅，無人問就唔特別講，平時出街同佢哋一齊，都冇人會覺得我有仔女，但今日係我入行三十周年第一次開演唱會，點都要叫佢哋嚟睇，唔講仲等幾時？因為他們考緊試，所以都係來一晚，太太低調唔想曝光，所以冇嚟睇，佢係我19歲識的初戀女友，所以咁多年傳的緋聞都係假，太太亦明白，從來不過問。」漢洋指已婚有仔女也不是秘密，自己有次飲醉講咗俾小雪聽，小雪否認他當時是飲醉自爆:「一早就知道啦！Amy（譚嘉荃）都知道。我兩個孩子與漢洋兩個小朋友都是同年，真係好橋。」
