由苑瓊丹（苑仔）主持的香港開電視節目《開工大吉77》，早前邀得久未露面的車保羅，現轉行做街市監督的車保羅，一下班即趕到接受苑瓊丹訪問。苑仔表示與車保羅多年沒見面，笑稱對方太高要「抬頭」傾計，車保羅就說因正職困身，亮相幕前要遷就時間，「依家我做街市監督，返工要穿制服、反光衣，唔可以亂咁請假，啲人約我拍嘢都要下午先得！其實都冇咩尷尬，要做咪做囉，由細到大都做過好多行，當年周梁淑儀搵演員，佢哋睇中搵我拍戲，拍咗三套之後，覺得好好玩所以入行。」
車保羅回想當年最風光時期，每日現身不同劇組，但因賭博而失去所有，「當年真係忙到組接組，我大概風光咗十年左右，真係忙到去銀行入錢都冇時間，每日一起身唔係問去邊度開工，而係問朋友收工去邊度玩！不過當年我賭錢，冇做咩投資最終咩都輸晒。」
隱暪公司「秘撈」拍電影，最終被揭發而令車保羅事業出現危機，「當年有人搵我拍戲，咁我就呃公司『生疱疹』，要去北京醫病，咁公司梗係比我走啦！到我拍完返香港，葉蒨文喺機場東面出，我就行西面啦，點知佢見到記者要做訪問，就話剛剛同完亞視嘅車保羅拍戲，咁就成件事都穿晒。最終都要返公司認錯，最終被人扣一個月糧，同時又比稅局查封啲戶口，我當時心諗真係玩完喇。」
因為「講大話」而離開電視圈，其後轉戰影壇，亦因為誠信而令事業跌入谷底，「當時因為冇錢請助手，自己又冇Mark清楚檔期，最終搞到失場，呢啲醜事傳千里，開始冇人搵我，靜咗足足六個月，我都開始諗吓係唔係要轉行先得。」
而車保羅在訪問期間多次提及菲籍妻子Inday，二人生活相當甜蜜，亦掌管車保羅財政大權，「當年我搵佢做鐘點執屋，啲錢周圍擺，佢就提我收好啲錢，我覺得呢個女人唔簡單，開始試吓佢，發現啲錢冇少到，仲要好齊整咁擺好，我對佢都開始動心。後期我經濟唔好，周圍問人借錢，佢幫我記低借咗邊個錢，要還比邊個咁，所以到今時今日，我都爭佢一個盛大婚禮。」
