實力派演員惠英紅（紅姐）近年主力從事電影工作，更憑精湛嘅演技三度獲封金像獎影后，以及奪得多項最佳女配角獎。
闊別電視圈十年，最近紅姐再為無綫拍攝劇集《鐵探》，其新作播出後觀眾反應非常熱烈，紛紛大讚紅姐好戲。
紅姐喺劇中飾演霸氣總警司「萬晞華」，性格強悍而且野心大，甚至會以各種手段但求達到目的。
前晚（10日）一集，紅姐就大爆超強演技，劇情講到佢為咗查出洪永城嘅死因，於口供房盤問梁競徽，氣勢凌人嘅紅姐更一手將對方推倒，並大摑梁三巴。網民都留言話佢心狠手辣，演得非常入肉。
另一場，紅姐與黃智賢嘅對罵戲，亦相當有火花，二人喺會議室疊聲互罵，場面相當激烈！更有網民話睇到入晒戲，齋望紅姐嘅眼神已覺得好驚驚，加上佢咄咄逼人指罵對手，都開始有啲討厭「萬晞華」咁話。
圖片來源：惠英紅@Instagram、myTV SUPER