懷孕六個月嘅胡杏兒，上個月底與老公李乘德（Philip）及囝囝Brendan飛抵泰國蘇梅島。一家三口參加完朋友婚禮後，繼續於當地度假，杏兒更分享多張性感孕照，大騷美好身材。
今日（10日）杏兒又貼出幾張由老公操刀嘅照片，以英文寫道：「Every woman needs a guy who can take great photos, do you agree? （每個女人都需要一個識影靚相嘅人，你同意嗎？）」
見杏兒坐於車窗旁露出微笑，而Philip就擔任愛妻嘅御用攝影師，手持電話幫老婆影相。網民都留言同意杏兒嘅講法，又大讚Philip影得唔錯。
另外，杏兒個鼻又再成為焦點，讓網民開始競猜佢腹中寶寶嘅性別。根據陀囝囝時嘅樣貌，杏兒懷第一胎時個鼻明顯愈來愈大；而現在，杏兒個鼻似乎又開始變大，佢之前亦話：「為甚麼我懷孕鼻子會變大，別人就不會呢？」令唔少網民估佢今次都係生仔。不過，又有人留意到杏兒早前分享嘅泳衣照，話佢肚圓圓，今次應該會生女。唔知邊個說法先係真嘅呢？
圖片來源：胡杏兒@Instagram