喺《波士早晨》飾演Roxie嘅李佳芯自從同洪永城攤牌後就無家可歸，馬玳落地行唯有靜靜雞係公司過夜。點知咁啱就畀一對偷食情侶撞破，以為公司有白衣鬼，仲揚言話要用保鮮紙同吸塵機嚟捉鬼添。唔少星爺粉絲睇到呢幕都會覺得似曾相識，事關星爺Cult片經典《回魂夜》有一幕提到：「捉鬼要用保鮮紙，打鬼要用朱古力。」然後仲將成件事講到好合理又爆笑添。
《波士早晨》會出現呢幕，唔多唔少都話咗畀大家知道編劇都係一個星爺粉，所以忍唔住要向星爺致敬。另一方面，李佳芯係呢一場戲表現不俗，唔單只做到調皮又驚青嘅效果，當佢見到黃智賢係微波爐拎佢條「叮」乾咗紅色內褲出嚟，仲有種被陌生人見到自己內衣褲着咩尺寸嘅感覺添。老實講，雖然呢條橋唔係第一次見，但仍然做到唔錯嘅喜劇效果，再次證明橋唔怕舊，最緊要受。最後，筆者當然唔會叫各位讀者試下「叮」內衣褲，因為咁貼身嘅衣物叮完都唔敢着，簡直損人不利己。
圖片來源：互聯網
影片來源：my TV SUPER，大都會電影