深夜重播中的《流氓大亨》下周便會播出大結局（３月２２日），唔少年輕網民睇完都驚嘆當年電視劇追看性強得如追龍一樣。當中萬梓良真打吳啟華，同埋劉嘉玲目睹舊情人結婚的心酸畫面都已經成為劇集經典橋段。要作為一套成功嘅電視劇除咗劇本同演員出色，劇集主題曲同插曲都身居要職。當年唔少劇集仲會度身訂製一首專屬主題曲，但估唔到〈城市足印〉成為《流氓大亨》主題曲只係一個偶然機會。
〈城市足印〉（主題曲）和〈婚紗背後〉（插曲）都是由當時大紅大紫的小鳳姐主唱。話說小鳳姐當年就快同康藝成音滿約，做完85年個人演唱會後，就密鑼緊鼓準備投向寶麗金懷抱，仲開始秘密籌備轉公司後的頭炮專輯《每一步》。點估得到，無綫電視呢個時候會想搵佢唱《流氓大亨》主題曲。
呢一次合作真係飛機撞紙鳶，原來小鳳姐當年啱啱錄完成隻《每一步》大碟，要再錄一首新歌實在不是易事。於是小鳳姐就建議無綫先同佢簡介《流氓大亨》故事大綱，再由《每一步》大碟中挑選合適的歌用。最後，小鳳姐就揀咗〈城市足印〉同埋〈婚紗背後〉作為劇集主題曲、插曲，而〈婚紗背後〉嘅歌詞更為編劇帶嚟創作靈感，創作咗同歌詞夾到絕，劉嘉玲目睹舊情人萬梓良偕鄭裕玲結婚的心酸畫面。
圖片來源：互聯網
影片來源：myTV SUPER
www.mytvsuper.com