側田（Justin）將於6月中舉行《My Beautiful Curse演唱會2019》，早前他表示會為個唱度身整歌。而新歌《完全變態》會由Justin親自作曲，內容更講述了他的心聲：「每次我喺台下做足所有嘅準備，就係為咗上台嗰下好似蝴蝶咁破蛹而出，唱好歌發熱發亮。」
Justin邀得導演Welby Chung為其打造新歌MV，拍攝當日Justin以簡單白色底衫和運動褲造型上陣，連帽都不可以戴，原來要被淋到滿頭顏料，Justin說：「淋上頭嘅係廣告彩，雖然比油漆易洗，但淋到成頭係，入晒耳仔，咁我唱住咁夾口型，結果成口都係，原來廣告彩食落口係苦苦哋，唔似香口膠，第一次食廣告彩。」
當時並沒有沖身的地方，Justin只能用水桶清洗顏料，問到他的皮膚會否敏感，Justin表示：「初頭冇，只係覺得好凍，一堆堆嘢撻咗落個頭再流落身，拍完之後，先發覺頸起咗一粒粒紅點，化妝師話有少少敏感，不過，拍得好乜都冇所謂啦！」MV花了4小時便完成拍攝，Justin笑稱：「話就話一take過，淋嘅時候個位唔啱，啲漿流得唔好睇，都係一路補一路淋，愈淋愈興奮，搞到我真係好似變態咁。」
