容祖兒《pretty crazy演唱會》仲有幾場就完，大家期待已久嘅嘉賓張敬軒「火龍果」終於在第16場登場！軒仔台上一番言論，搞到祖兒又喊又笑，Joey更說將來軒仔如果找不到女朋友幫佢生仔，她可以做代母！
昨晚祖兒唱完《特別嘉賓》冇特別介紹軒仔，欺騙觀眾話：「你哋唔好以為每日都有嘉賓得㗎，我今日唱一首我好鐘意嘅歌。」然後就唱《黃色大門》，唱到一半舞台升起， 張敬軒登場，觀眾即起哄歡呼。兩人唱完《黃色大門》，祖兒話：「各位觀眾！你哋今晚有福啦！」張敬軒就錫錫擁抱祖兒，「good個show先。」
軒仔繼續話：「祖兒喺show前，好擔心好擔心唔可以將最好狀態帶上舞台到，佢怕自己令大家失望，佢不斷付出自己，佢真係搵命搏，我未見過一個artist ，凌晨完show喉嚨重插住六枝針，就係為咗保証第二日有一個最好狀態見大家！」祖兒聽到呢到已經忍不住飙淚，大滴大滴淚水流落，歌迷大叫祖兒唔好喊，軒仔就攬攬示意安慰。
祖兒聽畢即表示好感動，「點解會有個咁好嘅朋友？成件事唔關佢事，佢有好多嘢忙，又開餐廳，十一月又開自己個『啲打show』」軒仔斗正，「我係中樂團！『啲打』喺呢度行過少少就係。」祖兒即破涕為笑，話其實軒仔不用晚晚出現，不過軒仔就話出現得好開心，學到好多嘢，「喺我哋這行業好多人話一運二命三風水，但係冇㗎，上帝好公平，你付出幾多收穫幾多。你付出幾多汗水努力，觀眾係會見到！」
觀眾又即報以熱烈掌聲。「多謝你張敬軒，估不到你講嘢咁溫情。」祖兒突然好嚴重咁話：「我諗過對佢最大報答，我諗過㗎。」軒仔：「唔駛以身相許啦！」料不到祖兒不是說以身相許，而是爆出：「如果你需要一個人，將來識不到一個女朋友都好，我可以做代母，係泰國捐精，哈哈哈……」觀眾笑到反眼時，張敬軒都嚇一跳笑住話：「咁我泰國搵得啦……」祖兒叉腰反問：「做咩依家好失禮你咩？我差啲咩？」
二人除了合唱《櫻花樹下》，更召喚了『樂壇妖孽』火龍果出場，「hello大家好嗎，大家有冇聽過我首《Pretty Hungry》？你哋今晚hun唔hungry？hungry就畀啲尖叫我聽。大家知不知我來做咩，踩場呀！」觀眾瘋狂歡呼，祖兒：「點呀，話晒今日個場係我，你第時開第時再算啦。」
