據說世界上擁有相同面孔嘅人有三個，每個人都有機會遇到同自己相似嘅人，而張繼聰（阿聰）今日就喺社交網貼相表示搵到「世界上另一個我」。
阿聰話收到張有趣嘅相，相中男子著住日本校服，又set個爆炸頭。重點係個樣同佢非常相似，搞到阿聰都誤信係佢本人：「間唔時有人send相俾我，話阿邊個同我好似樣，但係基本上大家只係一樣有鬚， 但係今日收到呢張相，我就嚇一跳， 因為完全冇印象影過呢張相，但係我都覺得呢個係我， 我依家成個人亂晒！」佢仲話對方係世界上另一個佢！
阿聰笑稱連佢囡囡都以為相中嘅男子係佢。
原來該男子係日本演員賀來賢人，為咗宣傳新劇，而喺Twitter分享爆炸頭照片。唔少網民都留言話「爆炸頭男子」同阿聰餅印一樣，「你唔好話俾我聽呢個唔係你」、「未睇caption 之前諗緊你扮緊邊個」，又有人要求阿聰跟足賀來賢人嘅造型影張相，睇下兩個人係咪似到十足。
圖片來源：張繼聰@Instagram、賀來賢人@Twitter