朱晨麗(朱朱) 正忙於拍攝民初新劇《大醬園》，平日看似斯文嘅朱朱，原來劈柴非常耍家，就連猛男韋家雄都甘拜下風。朱朱一埋位就乾脆利落地將柴劈開，全劇組都睇到目瞪口呆，朱朱得戚地話：「連韋家雄都劈唔到呀，道具手足見韋家雄劈極都劈唔開條柴，就同佢講『叫Morning朱幫你劈啦，佢好叻』，唔知點解劈柴對我嚟講，好似有特異功能咁，一Take過，好勁呀！」
朱朱於《大醬園》中擔正女主角，每日都要開工。但早前朱朱接到《法證先鋒IV》重拍通知，佢即將要面臨同時趕拍兩部劇集嘅噩耗，因為《大醬園》係民初劇，《法證》則是時裝，連同轉妝頭、造型、轉場及拍攝，朱朱將要陷入日夜瘋狂拍攝狀態。
朱朱表示：「收到重拍消息後，心情即刻沉晒，我即刻問法證嗰邊，我有幾多場口要重拍？但嗰邊都未回覆到我。而大醬園講我一個女人打拚撐起頭家，幾乎場場戲我都有份，如果兩邊一齊開，只得一、兩個鐘休息時間都要拍埋，到時要日接夜，夜接日，肯定冇得瞓覺，好擔心身體會負荷唔到，會頂唔順！」
朱朱坦言好多年冇試過放假，之前拍《法證》已經弄至五癆七傷，現時最希望拍攝順利完成，可以等她休息一下。