林二汶近日邀得RubberBand主音繆浩昌（6號）合唱新歌《超友誼》，藉由輕鬆的旋律，配以二汶哥哥一峰的歌詞，道出二汶的友情觀。日前，二人為歌曲拍攝MV，製作團隊到西環碼頭取景，導演要拍攝他們玩樂的鏡頭，令貪玩的二汶有機會整蠱6號。
二汶開心地說：「嗰度沿路冇乜欄桿，有一個shot係我要推住坐喺購物車入面嘅6號跑，其實都幾過癮嘅，因為我推住佢嗰條路，有少少暗斜向海邊，由於嗰邊係冇欄桿嘅海邊位，拍完嗰個shot之後，我揸住架shopping cart喺度等嘅期間，我同6號講：『如果我而家放手嘅話，咁你就可以游水㗎喇！』佢當然好驚啦！我亦當然冇咁做到。其實我有偷偷哋嘗試放過手半秒咁多，但係因為佢本身都有重量，所以架購物車其實都冇碌走。」
二汶又表示：「其實我推住佢嘅時候，我都好努力咁控制住個方向，如果唔係，我哋就會打斜，跟住大家一齊衝落海。」
另外，MV又大賣香港情懷， 二人其後到一間有50多年歷史的中國冰室拍攝。
平日活潑的二汶發現有「小強」蹤迹後，即嚇得不敢隨便亂動，二汶說：「因為嗰度都舊同係茶餐廳啦，咁有曱甴都係正常嘅，不過喺拍一個我單人shot時，我要行入水吧度咪嘴，我真係唔敢望水吧啲角落，我怕見到啲『會移動嘅嘢』。好好彩班crew派咗兩個人喺後面保護我，我哋諗住萬一有啲咩事，我跑咗出去先，等佢哋去善後。好好彩，最後我哋好快就完成咗嗰一part嘅拍攝，我亦都冇見到任何嘢。我真係好驚曱甴⋯⋯」