無綫節目《嫁到這世界邊端》播出後深受觀眾喜愛，主持陳貝兒踏遍全球，深探香港人妻嘅生活。今個月，製作團隊開拍第三輯，貝兒會去尼日利亞、埃及同摩洛哥三地。由於尼日利亞治安非常差，團隊獲安排荷槍實彈嘅軍裝警員24小時保護。
離開首站尼日利亞後，貝兒與攝製隊到達埃及，佢指一站比一站艱難，因為當地正值紅色旅遊警示，治安情況不比尼日利亞好太多。
貝兒於社交網分享照片，並寫道：「除了治安問題，原來最要小心嘅係衞生問題。到埗前港女人妻已經千叮萬囑要特別小心衞生、尤其係啲水。用花灑沖涼時一定一定要合埋個嘴同咪埋眼，沖完之後更加要再用樽裝水全身過冷河。佢話原來埃及啲水嘅含菌量比世衞標準高5000 倍！係 5000倍！佢自己亦曾經用水龍頭水洗面攪到爛面⋯⋯」
貝兒續表示：「到埗 check in 酒店之後，港女人妻仲話我哋聽呢間酒店之前有一團德國人，十幾人食物中毒，酒店經理唔接受客人投訴，仲話如果一間酒店有4-5% 客人因食物中毒而死亡係好正常。」佢一早預咗出外工作唔會食得飽：「經過冇啖好食嘅尼日利亞之後，再黎到唔可以亂食嘢嘅埃及，我好似已經瘦左⋯⋯」
另外，徐天佑亦到埃及旅遊，佢留言話此行絕對係自己人生最震撼之一：「夢想遊覽之地金字塔，竟然約到private tour。入左去金字塔嘅中心地帶，法老王嘅古墓，親手掂到個墓之餘，仲用左兩個鐘頭係嗰古墓裏面打坐冥想。墓穴裡面嘅氣氛冇得形容，磁場好厲害，金字塔指住天狼星，有說係地球中心，咁墓穴即係喺中心嘅中心，能量真係超爆勁到飛起！」
圖片來源：陳貝兒、徐天佑@Instagram