陳柏宇（Jason）上年搞咗個「陳伯茶聚」，約埋一班粉絲歎番一盅兩件。今年，Jason趁住推出新歌《中佬旅行團》，決定化身領隊「陳伯」，再度組團同粉絲去吃喝玩樂。
Jason同另一領隊細So，首站帶粉絲去室內釣蝦場釣蝦，唔少粉絲都成功有「蝦獲」，但Jason似乎出師不行，一直「食白果」，令佢不禁自嘲：「我係嚟餵蝦嘅，而唔係釣蝦嘅！」而場地員工加蝦落池後，Jason終於成功釣到蝦！更同粉絲釣到bonus蟹，全場人都大讚Jason厲害。
其後Jason同粉絲坐旅遊巴移師到一間餐廳，出席「中佬旅行團飯聚」。佢喺車上盡領隊「本份」，推銷限量產品。團友們都爭相競投，反應熱烈！Jason同粉絲透露太太符曉薇（Leanne）會帶愛女Abigail前來參與飯局，令大家十分期待。
5個幾月大嘅Abigail現身飯局，即時成為全場焦點，搶盡爸爸鋒頭！Abigail面對近百人，都毫無怯場，全程露出精靈可愛嘅樣，任影唔嬲。