鄧佩儀（Gloria）最近邀請了《機場特警》的拍檔王梓軒(Jonathan）合唱情歌，整個過程錄音、mixing加拍MV，不足兩星期便完成，非常快手！
Gloria說雙方很有火花：「我哋喺《機場特警》做情侶，感謝大家支持我哋，聖誕節我想送份特別嘅禮物俾佢哋，因為疫情下大家都要留喺屋企，所以我揀咗首台灣經典情歌《梁山伯與茱麗葉》翻唱，揀呢首唱時，我幻想到佢把聲應該好襯呢首歌，結果我冇錯，因為我哋錄音時，佢錄咗自己先，我聽住佢把聲，嘩！超好聽呀！希望大家會鍾意。」
而Jonathan就話：「呢首歌同我有啲淵源，原唱係曹格同卓文萱，十年前本來有機會同原唱者卓文萱合作，但當時撞咗嘢做，時間上安排唔到，估唔到依家有緣可以翻唱，而今次Gloria搵我合唱，我覺得係趕嘅，因為佢12月5號搵我，講緊聖誕節要出，17號就拍MV，但好慶幸Gloria依家做緊宣傳，佢都抽時間夜晚去錄音，好彩搵咗個好有效率嘅團體同導演，今次幫佢錄音我都有驚喜，有進步啦！」
Gloria大讚Jonathan：「好開心有Jonathan指導我，喺錄音室好似上咗堂唱歌班咁，原來我把聲可以有另一個texture，好興奮呀！所以錄音之後嗰幾日，我都不斷用唔同方法去唱歌，著咗火咁，原來我把聲可以咁。」更想同Jonathan合唱多幾次，Jonathan謂只要Gloria請食飯便可以，並為即將舉行的頒獎禮替她拉票：「我個角色唔使投，投晒俾阿銀（鄧角色）。」
部分圖片來源：my TV SUPER(www.mytvsuper.com)