有族長之稱的陳健安（安仔）與樂隊The Hertz已多次合作，但對於今次合作開Show卻是第一次，The Hertz表示：「我哋好欣賞族長，已經合作過兩次，不過兩次都只係合作幾首歌，今次可以一齊搞一個concert，定晒成個旅程嘅歌單、然後再重新編排，真係好令人興奮！」
安仔本身都很喜歡The Hertz的作品，所以同樣期待能夠擦出火花，他說：「The Hertz嘅作品除咗Dreamy仲好Groovy，聽佢哋嘅歌會Chok甩頭。呢啲曲風都係自己好喜歡，所以好早之前我喺Online搞嘅個人演唱會就搵咗佢哋做嘉賓，玩得好開心！我同主音Herman都鍾意Britpop、British rock，所以今次喺曲風上面應該會好好玩，好期待改編同唱大家嘅歌。」
除了互相欣賞對方的音樂作品外，The Hertz亦分享了原來安仔私底下十分暖男，主音Herman說：「族長私底下同喺台上分別唔大，都係十分溫暖同埋caring嘅一個人。覺得咁樣嘅佢好好，好真。上次我哋搞專場前，佢喺電話對我嘅鼓勵令到我冇咁緊張，同埋喺台上講嘅一番說話我哋都記到今日。所以純粹可以話族長真係一個好好嘅人！」