入行十六年，衛詩雅（Michelle）終於憑《不日成婚2》獲提名金像獎最佳女主角，雖然遇上大熱《白日之下》的余香凝，但一眾影圈台前幕後都幫Michelle打氣造勢，除了演技，亦因為Michelle多年來對電影的態度和執著，大家都喜歡這位默默等待發光的女演員。
衛詩雅，這個名字卻常常出現錯摸情節，最近Michelle就被家燕姐點錯相，錯有錯着，竟成為網上熱話。連詩雅又好、衛詩又好，對衛詩雅來說，終於被看見的感覺更重要。
問Michelle幾時開始喜歡演戲？她說︰「拍第一套劇《四葉草之盛裝舞步愛作戰》的第一個鏡頭，我已經知道自己鍾意拍戲。點講呢？有一種小朋友第一次食雪糕嘅感覺，吓！原來個世界有啲咁嘅嘢㗎？」
由《前度》、《囡囡》、《原諒他77次》，到一七年接拍邱禮濤執導的《失眠》，Michelle終於擔正女主角，夥拍影帝黃秋生，一人分飾命運悲慘的雙胞胎姊妹大獲好評。那次，她以為是自己最接近獎項的一次，「的確是有些期望，當時以為有機會提名，結果冇，有一段時間反覆問自己，係咪演得未夠好？這次之後，我就完全冇諗過甚麼獎項了，獎嘅嘢應該唔關自己事，好似醒咗咁！原來鍾意演戲就夠喇，唔會再令自己諗多咗，所以點解《不日成婚2》可以提名會咁驚喜，因為愛情喜劇一向都難（入圍），但點都好，最緊要之後大家開戲嘅時候，『衛詩雅』仲喺個list上面，被人看見的感覺已經好開心。」
新一代演員竄起，夾到中層的演員要努力求生，主動是基本，其次是膽量。為拍戲可以去到幾盡？Michelle話如果《不日成婚》開拍第3集，故事應該講到「可兒」生仔，「如果真係開拍，我又真係有BB，我唔介意團隊入嚟產房拍住我生，加入戲裏面，我都應該唔會順產㗎喇，剖腹冇乜所謂，一個咁珍貴畫面，應該要好好保留。」Michelle笑笑口話：「未來嗰個老公，負責印吓汗斟吓水就OK，要一take過，責任重大啊！」
《不日成婚》第1集題材貼地，對白搞笑，叫好又叫座，原班人馬開拍第2集，男女主角由同居轉入直路，談婚論嫁，面對女人與女人最難搞的婆媳關係！「『可兒』這個角色陪住我一齊成長，雖然相隔只是三年，但好似經歷了很多，某程度上，有我個人的經歷，雖然我未結婚，但在三十歲左右的時候，當時有一個拍咗幾年拖的男朋友，我知佢將會求婚，但因為佢媽咪……應該點形容呢，係有啲惡啃，我明白每位母親，都會覺得自己個仔係天子驕子，但一開始佢就覺得我係高攀佢個仔，最恐怖係，個仔在場的話，佢就好nice，但只要對住我就唔同晒，所以我睇《不》劇本的時候好深感受，我都講咗呢個經歷俾導演聽，所以加咗少少元素落去。」
電影中，男主角陳家樂會為女友發聲，但現實中那個男友呢？「就係冇囉，所以我覺得，嘩！太慘啦，未結婚已經咁樣，我好記得她講咗句『我鍾唔鍾意你唔緊要啦，我個仔鍾意你咋嘛』，點解當時我知道佢準備求婚呢？因為佢問咗我爹哋媽咪，咁suppose唔會同我講啦，驚喜吖嘛，但我爹哋媽咪好驚，尤其是爹哋，有一日同我放狗，突然認真mode問我『阿妹，如果你真係嫁俾佢，我係會擔心』，佢唔係唔鍾意個男仔，佢係擔心個女俾人蝦，都唔係因為爹哋呢句說話，其實我一知道佢要求婚，我已經好驚，我即刻有個畫面，我應該好似灰姑娘咁要抹地板，哈哈！跟住我就好唔想，結婚唔應該係咁。」
當年三十歲，正是女仔最想結婚的階段，問今年三十九歲的Michelle恨唔恨嫁？她說︰「真係覺得嗰個人啱、時機啱，我覺得就會發生！從來都冇覺得幾多歲要結婚，只不過係佢想結婚咋嘛，哈哈！我從來冇恨嫁，可能因為做演員，拍戲都結咗好多次，穿婚紗感覺不大，我覺得如果我真係結婚，我諗好多女仔都會好緊張，套衫點呀、rundown點呀、請咩人唔請咩人呀，我希望我嘅婚禮好casual，講真，婚禮擺酒，我都係為父母而做，咁辛苦養大我，佢哋開心緊要過我開心。」
攝影（封面）：Matt Yau
攝影（花絮）︰伍敏慧
形象︰Katy Tsa
化妝︰MW
髮型︰Wil Tam＠ArtifyLab
服裝：TORY BURCH, ANTEPRIMA, SHIATZY CHEN