新演員陳焯嵐及郭東彩（東東）有份主演的ViuTV劇集《那年盛夏我們綻放如花》，劇情愈來愈緊湊。戲外戲內均是情侶的他們，首次合作拍劇非常默契。
首次拍劇的焯嵐在戲中飾演欺凌者，他稱眾多欺凌場口中，他最難忘欺凌飾演「臭輝」的李嘉毅，戲中他在更衣室迫李嘉毅除褲，又向對方扔水彈，焯嵐憶述：「Roll機前大家仲一齊開心玩緊，但一Roll機就要演滅絕人性欺凌角色，拍嘅過程內心都有唔舒服，而拍之前有同對方好好溝通。」除了跟「臭輝」的演出外，焯嵐指跟女友東東在昨晚（7日）那場掌摑戲亦感難忘，更被網民讚演得迫真兼好戲，他說：「初初拍打佢呢場戲，係有留力，但反而俾東東鬧，佢叫我一定用真力打。拍嗰陣都有NG，但唔可以NG太多，只可以3、4Take，唔係佢塊臉會紅會腫。」要出力打女友，焯嵐雖然感到「肉赤」，但見東東可以「交足戲」，他感安慰：「同東東戲中演情侶，當然係好事，如果換第二個女演員拍呢場打戲，一定會留手，但對住女友就唔使。」
至於被打的東東亦指這場掌摑戲好有衝擊力，她指現實中不會與男友大打出手，故此對今場戲感覺極有新鮮感，而拍攝前，她與男友細心排練及溝通，她說：「呢場戲，如果媽咪見到應該好心痛，不過自己拍攝唔辛苦，唔知係咪我皮厚，所以唔覺痛，亦冇腫。反而咁大力打落去，男朋友先最有壓力。」東東續指，現實中絕對無法接受被另一半動粗，她表示：「如果另一半用暴力，就一定係唔care自己，所以要遠離。」此外，曾參與《全民造星4》的東東，因感到不適合女團生活，而在30強止步，向來對演戲感興趣的她，表示經歷今次拍劇後，對拍戲的興趣有增冇減，今後她希望可以演精神病人、殺人犯等角色，談到最想跟哪位演員合作？東東坦言希望有機會跟梁朝偉合作，皆因對方是她心中無人可取代的偶像。