Advertisement

陳志雲為舞台劇激減30磅 吞「水球」入胃 一日一針拮肚

本地
2023.11.24
撰文:文嘉龍攝影:洪志富

whatsapp-image-2023-11-23-at-1-44-35-pm-21 whatsapp-image-2023-11-23-at-1-44-35-pm-30陳志雲(Stephen)最近為下月公映的舞台劇密密排戲,要應付劇中一人分飾三角的重任,自知今年初「食肥咗」,他笑說:「之前食得腫脹咗啲!」雖然導演叫他不用減肥,但陳志雲話「唔得!太肥都係唔好睇!」於是三管齊下,經醫生、營養師和心理醫生安排,將「水球」吞落胃部,再每日打一針落肚,奉行「一日五餐」秘訣,五個月內減了30磅之多。

今年64歲的志雲大師,電台舞台劇自家網上頻道工作未停過,大師話永不言休「做到死嗰日」,減肥成功的他說:「我想靚啲嘛,但係有個唔好處,我一瘦返就會狂買衫囉!」大師愛靚又愛命。

最近忙於為舞台劇排練的陳志雲,與同為電台界的倪秉郎和王耀祖合作,陳志雲今次於推理劇《作家出道殺人事件》中更一人挑戰三角。三年前在自家YouTube頻道推出的處境劇《姨媽到Imado》,他以女裝造型亮相的Margaret,今次再度重現在舞台劇中,「三個角色,一個係編輯、一個係作家,另外就係來自英國好高貴嘅女士Margaret。今次出現呢個Margaret,因為佢係英國人,所以會有金色頭髮。Margaret今次係唔係全英語演出呢?我會話八成啦,佢啲廣東話唔係好正,講出嚟都幾好笑!」

扮女人當然難不到陳志雲,最難,要在舞台男變女換裝,「呢個係大挑戰,我哋未試到個quick change,今次做Margaret最大挑戰係換衫,化咗個濃妝再變返做男人,都要考下功夫!」

為了最靚狀態示人,訪問當日雖然陳志雲未有穿上Margaret造型,以打呔西裝正經作家look見人,但現場所見身形瘦足兩個碼,塊面又長又尖,原來他特別下功夫減肥,「我有問過導演(余振球)需唔需要減肥,因為之前我食得腫脹咗,因為我塊面一向唔係好肥,所以我會不知不覺食多咗,但係導演就話唔使減肥,我話唔得,出嚟太肥都係唔好睇,我用咗呢個來做動力,幫自己減肥,減咗五個月啦!」

由6月開始的減肥大計,陳志雲說:「嘩!好複雜!我今次有睇醫生、睇營養師、睇埋臨床心理學家,同一個地方三個人去幫我減肥。手術上面都有做,依家有一個最新方法控制食慾,就係喺胃裏面放個水球,放水球有兩個方法,一個就係你吞落去,好似粒藥丸咁細吞咗落去,然後醫生再將生理鹽水灌入去,你會feel到啲水入去水球內漲咗,你個胃就三分一會hold住咗,之後呢個水球就會綁埋咗個口,呢個好處係佢只會喺你身體逗留四個月左右,跟住佢會開口,啲水會漏返出嚟,而包住水球嘅水就好似一塊菜咁,你會排泄返出嚟!」

一日要分五餐食

至於第二種方法,是用胃鏡放「水球」入胃,可以放成年都得,但陳志雲說:「我選擇咗第一種放四個月,其實都有少少辛苦,頭兩日會覺得好似成日頂住,甚至有啲好似想嘔感覺,有好幾日只可以食流質,再落去食一啲磨碎糊仔,跟住先再食返嘢,同埋你𡁻嘢要𡁻到好爛先至食,已經幫咗好多!」以為放完「水球」搞掂,原來仍有第二波,「我完咗水球之後,我就去第二種就係打針,呢個針以前要嚟醫糖尿病,依家改變咗一啲做法,去幫助人減肥。」打針,又有分兩種,「一隻係一日一支,另外一隻係一個禮拜一支,打一個禮拜一支嗰隻新啲,斷晒市全香港都冇,只有一日一支,我依家就打緊一日一支。」陳志雲說,現在自己每日為自己啪針,他說不會痛,「我多數打肚,但唔好每日打同一個位,因為打得多會瘀,支針咁細咁幼,周圍篤下囉!」

whatsapp-image-2023-11-20-at-3-48-34-pmwhatsapp-image-2023-11-23-at-1-44-35-pm-6第三關要見臨床心理學家,解決了陳志雲的暴食症,「點解我話要睇埋心理學家,因為我最大問題有一個叫Binge Eat(暴食),夜晚當我覺得我嘅Me Time,我可以放低工作去睇Netflix嘅時候,我就會好想去食嘢,我食嘢方法好似我做嘢咁,我唔想見到啲嘢未完,所以我未食完都可以食晒佢,我有時會飽到嘔!所以見完心理醫生之後,佢同我分析我食嘢pattern,點解我會有咁嘅暴食症,了解返我童年細個好多嘢,依家我都仲睇緊,佢俾咗個方法我,叫我一日分五餐食,每隔四個鐘頭食一次,你肚唔肚餓都食,總之唔好多過四個鐘頭,就要食一次,我覺得真係幫到我!食咩都得,有時食太過清,佢反而會話你夠唔夠飽,會唔會食得太少!」

五個月前的巔峰期,陳志雲體重達92 kg,五個月下來現在是78 kg,足足瘦了30磅,但他說希望再瘦多4 kg。「依家都夠,我唔好bounce back(反彈)就得㗎啦!」陳志雲說,見心理醫生很有效,「一個係physically身體上幫你,另一個係心理上幫你,其實好多問題都係因為心理上面引起。我好多時都將責任擺咗喺自己嗰度,好容易有一個自疚或者自責感覺,包括食嘢都係,我個醫生唔係催眠,佢係用一個Bilateral手法,幫你call返啲回憶出嚟,有好多陳年舊事都會嘔返出嚟,都係一個好方法!」

問陳志雲,最大的心理問題影響,算不算那糾纏七年的涉貪官司?大師說:「我諗樣樣都關,一定會有啲關事!官司時候係最艱難狀態,所以依家點樣講,都係舒適好多!」陳志雲的CV,香港人都很清楚,由官場到轉戰電台到電視台權傾朝野大人物,一場涉貪官司打落凡間,10年請辭無綫後的大師,除了每日在商台開咪外,接觸瓣數愈來愈多,三年前開設的自家YouTube《志雲頻道》,如今已擁超過28萬人訂閱,另外舞台劇的世界更是他近年非常享受的媒介。

今次參演的舞台劇,背景設置在六七年暴動的香港,問陳志雲對香港六十年代的回憶,他笑說:「我好似未出世!哈哈哈!講笑啫!我記得好清楚㗎,嗰陣時有嗰啲土製菠蘿,我哋細個就好開心,因為一有土製菠蘿就唔使返學,又記得有一次,本來約咗全家人,一齊去樂官戲院睇《齊瓦哥醫生》,點知話有土製菠蘿冇得去,嗰啲就唔開心啦!我好鍾意以前香港嘅情懷,好似簡單啲,大家生活又愉快啲,依家科技好進步,但係我覺得複雜過頭,使唔使咁快呀?以前嘅人情味,我覺得濃啲!」

爛船都有三斤釘

whatsapp-image-2023-11-23-at-1-44-35-pm-4永不言休的陳志雲說:「我做管理同行政做咗好耐,我覺得好悶。近年來我用自由身,去參與好多唔同工作,我以前冇試過,以前工作我都鍾意,但係依家新工作,俾咗我新刺激,我每日都好興奮,好願意去返工,我覺得係娛樂。我一向都唔諗退休,我諗我一唔做嘢,我就會死,雖然我做嘢都會死,但唔做嘢,可能會死得快啲!依家新世代好多門檻,YouTube我由一做到七,日日都忙住去做,但我又開心喎!」現任商台首席智囊的陳志雲,仍然相信電台影響力,「收音機同報紙一樣,永遠都有返自己功能同定位,方法可能唔同咗,未必係拎住個收音機嚟聽,依家都好難買到收音機啦,但喺手機仍然都有好多人。畢竟商業電台都64年,佢有自己一班擁躉,所以有一個基礎去再發展新媒體,而的確亦都有另外一間公司去發展新媒體,都做得唔錯嘅!」

說到舊主無綫,近來眾多傳聞,如果有新班子要陳志雲回朝又如何?「你呢個假設性問題,我諗唔會發生!哈哈!如果我想做,我嗰陣時就唔會走啦!老實講,佢叫我返去,我都會覺得我太老,佢應該要搵啲更年青嘅人。以前都有另外好幾個電視台,邀請過我去做,我都係介紹返啲年青啲嘅人俾佢,我已經太老喇!」曾志偉都70歲,不是比64歲的陳志雲更老?大師笑言:「我覺得我唔啱啫,佢可能覺得自己仲有好多嘢喺裏面!志偉唔同,佢一路冇停過,佢喺內地,就算祖藍都係,佢喺內地都冇停過做好多嘢,變咗佢喺嗰方面嘅關係,可能幫到TVB多啲!」

雖然不在其位,但陳志雲怎樣看現在的無綫?「我冇乜點睇呀,哈哈!所以你叫我評佢啲電視節目,又唔係好公道,我連佢嘅新聞都比較少睇,所以我真係唔知!依家嗰啲artist,我都唔識邊個打邊個!如果講間公司有冇前景,一定有,好話唔好聽,爛船都有三斤釘,TVB都仲係有一個好強勁,有班底層基層觀眾撐住,只要佢哋唔好行錯路,隻船係唔會沉嘅!」信不信林家棟回巢掌政傳聞?「或者咁講,因為我以前嘅老闆何定鈞,佢一向講嘢都好小心,我睇報道,我唔知佢係咪有真係咁樣講,報道好似係引述佢,我自己冇接觸過佢去問,我覺得佢唔會無端端咁樣講,但係TVB已經澄清咗唔係啦,家棟自己亦都冇話係,當然以官方為準啦!」大師教路,唔好行錯路,要聽!

場地提供:Casky

姜濤 聲夢傳奇 MIRROR
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹