「開心派對2慈善演唱會」於昨晚（11月6日）假旺角麥花臣場館舉行，為紀念香港女兒、樂壇女皇梅艷芳逝世18周年，秉承梅姐生前提攜後輩及廣做善事的善心，昨晚演唱梅姐生前的經典金曲為主，其中以唐韋琪（Vikki姐姐）最具心思，與三位學生模仿梅姐與草蜢《愛將》造型及化妝，又跳又唱《夢伴》及《愛將》，贏得熱烈掌聲。Vikki表示為了對梅姐一點敬意來個大突破，特別請設計師訂造服裝，又請排舞老師練舞：「我哋用咗好多心機，由服裝到化妝及舞蹈都希望扮得神似，希望梅姐在天上睇到唔會笑我扮得醜啦！」Vikki並在台上感謝家人到場打氣，並說：「今晚有幸為梅姐演出，有幸將我由兒歌拉番入流行曲。」
邵音音（音音姐）分別演唱了《今天不回家》、《路邊的野花不要採》與及梅姐的國語歌《長藤掛銅鈴》，音音姐在台上講笑大搞氣氛，因為防疫關係戴著透明口罩落台演唱時，向觀眾講明「唔可以握手」，有男觀眾即大嗌「可唔可以鍚鍚？」音音姐則話「妖！聽唔到你講乜！」好朋友鍾叮噹則為音音姐伴舞跳拉丁，音音姐笑言：「跳老舞！」有粉絲送毛毛狗公仔，她又問：「乜狗嚟㗎？」有位小朋友上台送花，音音姐失望笑謂：「點解不是20歲小伙子呢？」搞到台下觀眾笑聲不絕。
譚嘉荃（Amy）演唱《心債》、漢陽唱《冰山大火》，兩人再合唱梅艷芳與張國榮的《緣份》，Amy表示一直好鍾意梅姐的《心債》，《緣份》亦想唱好耐，終於如願以償。而李紫昕（Purple）則唱《蔓珠莎華》及《夕陽之歌》，她表示是梅姐fans，參加歌歌比賽時唱亦是唱梅姐的歌，並特登選唱《夕陽之歌》向梅姐致敬，並說：「梅姐，仲有好多好多人好鍚妳，妳知道嗎？」
胡楓（修哥）則中氣十足演唱了3首其他歌星經典金曲《百花亭之戀》、《隨想曲》、《沉默是金》，觀眾狂嗌安歌，修哥打趣謂：「我就快90歲喇，時間過得好快。」修哥並透露正申請明年個唱慶祝90歲大壽，修哥並表示跟梅姐好熟稔，大讚梅姐好豪爽、好有義氣，非常好人，很佩服她。
昨晚在台上播放了即將上映的電影《梅艷芳》部分片段及眾星給梅姐愛的留言，睇到不少觀眾攞紙巾抺淚，有不少觀眾大嗌「梅姐，好掛住妳！」壓軸全體嘉賓歌手大合唱《友誼之光》，在熱鬧又感人之下圓滿落幕。