Advertisement

逆天奇案2|梁小冰直認老公係最佳拍檔 爆陳嘉輝每日「冧豬語錄」

本地
2024.04.18
撰文:孜卓芹
梁小冰同最佳拍檔一齊拍戲最放心。
梁小冰同最佳拍檔一齊拍戲最放心。

梁小冰相隔廿六年再回TVB拍《逆天奇案2》,更與老公陳嘉輝相隔廿三年再合作飾演一對!昨晚(17日)播出的一集,歷盡不幸的阿蘭(梁小冰飾)最終接受徐仁達(陳嘉輝飾)追求譜黃昏戀。

二人劇中發展黃昏戀。
二人劇中發展黃昏戀。

講到與老公再度合作,小冰笑言兩人默契依舊,並笑言全靠有嘉輝哥做拍檔:「我哋會喺屋企對好晒啲對白,但唔會排戲,因為到現場先演會撞到個火花出嚟。我好多謝佢,佢係睇住你嘅情緒再去交對白,例如會睇住你啲眼淚流晒落嚟,佢先去下一Part(對白),冇一個拍檔係可以事隔咁多年個默契都仲可以喺度。」

小冰又大讚老公專業:「佢好有紀律,唔止準時仲會早到,所有對白都記到滾瓜爛熟,同埋佢係一個好好先生,唔鍾意同人鬧交,同所有人都交流得好好。」小冰笑謂與嘉輝哥合作過的女演員都有讚冇彈:「好似鍾嘉欣、蘇玉華、陳瀅、反琪(蔣家旻)佢哋見到我,都會話你老公好正,真係一個好好嘅對手,我真係覺得好幸福。」

小冰話好多女演員都同佢講,你老公好正。
小冰話好多女演員都同佢講,你老公好正。

嘉輝哥在劇中是一位癡心情長劍、對阿蘭呵護備至,現實中嘉輝哥亦同樣是絕世好男人加愛妻號,小冰受訪時開心分享嘉輝哥每日「冧豬語錄」:「我老公好玩得,每日起身都會話:『你好靚喎』,結婚廿幾年都係咁,講嘢好甜,就算我捲到個頭好似包租婆咁,佢都話:『點解可以咁靚』。」小冰坦言兩人亦有鬧交時,但嘉輝哥僅以一招便能成功收服老婆,「我性格係一有問題就會blablabla講晒出嚟,佢就叫我慢慢講、唔好嬲,同埋叫我可以選擇用另一種方式(表達),例如喺最嬲時唔好講嘢,寫出嚟。以前我就寫晒喺張紙上,寫完幾千字都已經唔嬲啦,依家就轉用WhatsApp。」小冰笑謂兩人結婚多年,現在已經是無聲勝有聲,「依家唔使講嘢都知大家諗咩㗎喇,唔使咁多說話同溝通,呢個就係默契!」

小冰都好入戲。
小冰都好入戲。

講到劇中差不多由頭喊到落尾,小冰說:「差唔多全部一Take過,最主要係入片場時已經進入個情緒,一個演員必須具備嘅技能就係共情,咁樣你先可以代入到個角色,有好多嘢你冇可能現實生活上經歷到,做演員好玩就係呢啲囉!」

MIRROR 聲夢傳奇 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹