蘇皓兒向來喜歡運動，難得聯同好友陳安立為ViuTV綜藝節目《單車踩爆日本》擔任主持，她說未出發先興奮，不過在過程中也遇上不少挑戰，「第一次參與綜藝節目拍攝，感覺同拍劇好大分別，因為旅遊節目好多嘢都冇得準備，好多事情要即場發揮，好考隨機應變同執生能力。」過往去旅遊，蘇皓兒主要乘搭交通工具，今次拍攝，初嚐單車自駕遊滋味，感覺享受，她謂：「踩單車可以慢慢欣賞沿途風景，不過頭兩日踩單車對我嚟講有啲困難，雖然平時我有踩單車，但今次第一次喺公路、山路踩，好考驗體力同膽量，有時候經過隧道，啲大貨車喺身邊，感覺都好刺激。」
她表示最難忘冒雨踩單車落斜路，「落雨又凍又濕，啲雨打埋身幾乎睜唔開眼，好辛苦，當中都有少少受傷，好彩之後雨過天晴，仲見到好靚嘅風景，即刻覺得咩都值得。」問到今次以單車自駕遊可有令美腿變粗？蘇皓兒表示：「雖然日日踩單車，但唔覺得對腳粗咗，反而覺得曬黑咗好多，本身帶咗好多唔同款式嘅衫去換，但最後都長期着外套，因為發覺曬到膊頭有啲雀斑。」
