大台節目《識貨》轉眼進入尾聲，昨晚播出的節目總共淘汰四名藝人，包括路芙、何遠東，以及踢館的丁子朗及郭子豪，換言之留下來的四位「見習主播」陳嘉佳、陳自瑤、黎諾懿、黃頌明則成功晉身準決賽。
路芙與一直表現出色，故當主持鄭裕玲宣布二人被淘汰時，現場眾人表現愕然。在全場掌聲下離場的路芙，大灑洋蔥自揭三年冇工開，並勉勵同樣前路茫茫的同行謂：「我哋嚟學做生意，其實係畀自己一條生路行，實際上我過去三年真係冇嘢做，真係冇搞作，自己又做剪片又寫網站又帶貨。真係要畀啲機會突然冇嘢做嘅藝人，呢個（學做帶貨）就係一個出路。大家唔好再話等疫情完咗我又有嘢拍喇，真係唔好諗喇，因為有排都諗唔到，不如踏實啲去做呢件事。」同場的子豪聽到路芙一番肺腑之言時不無感動，更坦承有所反思：「我有啲感動，我覺得自己身在福中要知福，我喺有得拍劇又有得拍綜藝，真係好幸福，要好好珍惜。」
昨晚節目播出後，路芙於社交網上載了自己的演出片段，並感性留言謂：「過去兩、三年時間真係好難行，好在仲有幾位好朋友同埋我嘅信仰（畀到我）最大堅持，當然家人係一個最重要嘅愛護；大家作為藝人疫情令到自己冇工作做，千祈唔好灰心，盡量學習多啲市面上需要嘅技能，咁就能夠有機會扭轉自己個局勢。」路芙對這兩年期間找她工作的朋友表示感恩之餘，亦感激無綫給予她這個演出機會，讓她更認識自己及學習了更多技術。
