洪嘉豪（Kaho）首個個人演唱會《The Cycle of…Kaho Hung Live 2022》昨晚（12日）於竹翠公園舉行 ，Kaho的《困獸鬥》節日拍檔程人富、Win Win（楊安妮）、米露迪、Dee姐（陳海寧），Zpecial的康聰和Waiyin、衞詩，岑寧兒等亦有來捧場。
Kaho以《我懂》揭開序幕，再配以雪景非常浪漫，隨後跳唱出《表情符號》及自彈自唱《好奇殺死愛》，全場橙海熒光棒非常熱烈。昨晚他請來了兩位嘉賓，兩人都是他演出路上非常重要的人，第一位嘉賓是好朋友陳蕾，兩人合唱《救》之後，Kaho話，「我剛刻意不唔同你對望，我好驚笑左….」陳蕾反駁：「車，我ready曬你拖我手，點知你又唔拖，講起自己都想笑。哈哈。」Kaho話自己第一個個人演唱會，所以好希望請到出道四年以來，最重要的歌手朋友，「陳蕾你不單止重要，你係我 best friend，又係院友心目中最喜愛女歌手！好多謝你這些年來都肯聽我講心事，你知啦我雖然有班兄弟，但係佢地係唔會明，所以我開心唔開心都同你講⋯⋯」陳蕾：「其實你有冇發現，我有時只係扮聽得明？哈哈….我知道佢最近壓力大，所以我寫左千字文鼓勵下，點知佢只係回覆：收到明天見。」Kaho：「吓，邊度係千字文，你得個五，六句之嘛！但係呢幾個月真係好辛苦，所以咁囉… 總之！多謝你啦。」
第二位嘉賓是衛蘭（Janice），二人合唱嘉豪作曲的《別放手》，這首Demo後來成為了Janice的《面對》，亦是因為這首歌令華納跟Kaho簽約。Kaho感激Janice給了自己很多機會：「全部都係你畀我，去到邊都帶住我。」然後又狂講大堆英文 「Don’t make me cry，I love you⋯」引得jancie及觀眾都大笑。Kaho坦言她不只是入行四年很重要的歌手朋友，而是「Best Friend」。陳蕾透露昨晚寫了千字文給Kaho，硬咽表示得知他這四年很不容易，直言他是值得大家支持：「頭先成個後台冇晒人，大家都好想見證佢成功開個人演唱會，好戥你開心。放心，好多人都好愛你⋯⋯身邊男女老少都好鍾意呢個男仔，佢嘅努力有咁多人見到，唔知點解佢要冇信心，入座率話咗畀佢知。」她再高呼並唱出《相信一切是最好的安排》。
此外有「華納張家輝」之稱的Kaho更獲張家輝拍片祝賀開騷，張家輝說：「嘉豪，聽講你開騷啦喎，喺度祝你有個Good Show先，我亦都代阿化骨龍一齊祝你有一個圓滿嘅演出、順順利利，恭喜恭喜」。之前全不知情的Kaho 一見家輝個樣出現營光幕，即跪在地上驚呼：「好勁呀呢個！」開心到飛起。演唱會尾聲，在觀眾瘋狂叫「除衫」的情況下，Kaho順應民意掀高上衣曬肌，全場High爆，再以《逆時車站》作結，演唱會於晚上11時圓滿落幕。
騷後kaho接受訪問，他說，其實這個月來又拍戲又排演唱會、練結他，排舞唱歌背日文真的壓很大，又不可以亂食o野發洩，結果有一晚收工回家，自己在電梯裡面開始喊，回到家要係門口喊左一分鐘，抹乾眼淚先敢入屋，怕媽咪睇到。不過今晚順利演出成功，所有眼淚都已值回票價。他坦言，頭幾首歌是非常之緊張，之後就開始放鬆，享受自己第一次的舞台。
說到院友覺得他孤寒不肯除衫，Kaho話，「咪揭左少少囉。聽日會唔會多D?哎也聽日再講啦，咁造型師負責叫我著咩衫，唔係我話事….第日去紅館再除啦，不過一定唔會除褲啦我⋯⋯」唱到主角光環，Kaho都有眼濕濕，「係呀，我死忍。喊左少少…..因為覺得咁開心日子，其實唔應該喊。我整條片出來，出晒院友公司同事d樣，其實係想搞喊佢地，唔係搞喊自己嘛。」
