Advertisement

蔡楓華自資開騷 入紙紅館 細訴哥哥「光輝」回憶

本地
2023.05.05
撰文:文嘉龍攝影:洪志富

whatsapp-image-2023-05-03-at-6-04-38-pm-25 whatsapp-image-2023-05-03-at-6-04-38-pm-10 whatsapp-image-2023-05-03-at-6-04-38-pm-9蔡楓華下月將於荃灣大會堂舉行演唱會,去年10月兩場爆滿,今次再接再厲搞part 2。自資出品,他說:「我都係托賴,我冇蝕過本!」演唱會名為《情深永記》,今年62歲的蔡楓華,多年來令人永記的,不能不提「剎那光輝」事件,對於哥哥張國榮,點滴回憶在心頭,但他說論傷害性,「癲王」卻遠比「光輝」大打擊。

真正經歷高山低谷,如今最懂「坦然」兩個字,「人哋傷害咗你,已經發生咗,惟有向前望囉!譬如你有仇人,最好報仇方法,做好你自己!」有生之年繼續唱下去,最近更入紙再圓紅館夢。

多年來蔡楓華都有班「忠粉」不離不棄,每當網上出現各種新舊消息,粉絲都會自動轉發,動員力不少。訪問這天,「歌迷助手」更陪同到場,蔡楓華準時現身,戴上永遠的黑超,是多年前眼疾手術後為避強光而必備的,他說:「我尋晚成晚冇瞓過,依家好攰!」問他為什麼沒睡,他卻沒有明言。兩度開騷都是自資,問他近年的收入如何?「疫情時冇得講,邊個都開唔到,我都有影響,但我一向都有儲蓄,仲有啲股票係收息股,冇乜問題!我依家好慳,又冇不良嗜好,嫖賭飲吹與我無關。近期又活躍返,國內啱啱先搵我去順德表演,之後可能再做多個騷去美加。」

whatsapp-image-2023-05-03-at-6-04-38-pm-2 whatsapp-image-2023-05-03-at-6-04-38-pm-1whatsapp-image-2023-05-03-at-6-04-38-pm-3蔡楓華今年62歲,如果哥哥張國榮在生,比他還大4歲;今年是哥哥逝世廿周年,蔡楓華當年的一句「一時嘅光輝未必係永恆」,雖被流傳為「一剎那嘅光輝並不代表永恆」,字眼不同但意思相去不遠。蔡楓華說「嗰句説話」之後,其實他與張國榮並沒有芥蒂,「《季選》嗰一句之後,我都仲有同Leslie有聯繫,你哋唔知咋嘛!嗰件事85年發生,86年商台擂台獎,等於《叱咤》前身,全香港最賣得嗰十個歌星,酒店頒獎然後再落紅館唱,Leslie坐喺我隔離,再隔離就學友再到羅文,我唱《絕對空虛》,第一個起身拍手掌拍到爛就係張國榮,嗰時發生咗之後成年幾,如果話我同張國榮交惡咗,冇可能!」

為韓馬利胞妹得罪高層

說到與哥哥的難忘回憶,蔡楓華說:「你哋叫哥哥,我叫Leslie,我覺得親切啲!我同佢識於微時,我記得有一次我代表香港電台、佢代表麗的電視,大家去沙田一個表演,Leslie同我講,你睇住,最多噓嗰個係我,我話你唔使驚,我肯定我出嚟都俾人噓,因為冇人識邊個叫蔡楓華當時,出到去,我真係俾人噓得好緊要,但我一開聲唱《殘夢》,跟住又幾好反應喎;Leslie就好型仔,佢走上去真係俾人噓,佢一生都難忘呢件事,佢有頂帽諗住飛出去,送俾啲所謂歌迷,啲人飛返(頂帽)轉頭,當時佢好難堪!」

蔡楓華說,當年他與張國榮、陳百強三個先後出道,最早紅的是陳百強、之後是他,哥哥最後,他說張國榮是教識他打士碌架的人,「我同佢、同陳百強成日去Disco Disco跳舞、飲酒傾偈;其實佢哋初初同阿Paul鍾保羅合稱『中環三太子』,三個一齊拍咗套戲叫《失業生》(81年),後期鍾保羅離開咗佢哋,變相冇咗『中環三太子』呢個稱號。」

whatsapp-image-2023-05-03-at-6-04-38-pm-26 whatsapp-image-2023-05-03-at-6-04-38-pm-27很多人認為「剎那光輝」事件令蔡楓華事業陷低潮,他卻說真正原因,是他得罪了當時的唱片公司(CBS Sony)高層,「我得罪咗Sony總經理(Tony Lee),因為我86年時候,我保住韓馬利個妹韓燕虹(82年香港小姐友誼小姐),因為佢係我保母,負責照顧我。我答應佢,你做到我隻碟白金,點知突然間公司話要炒佢,我本來唔應該出聲,但佢求到我,我冇理由唔幫佢。我同大老闆講,你要炒韓燕虹冇問題,但我希望大老闆,因為我有個演唱會又有隻碟,一路都係佢跟開,你俾佢跟晒先叫佢離職,大老闆答應咗我。當時總經理非常唔滿意,我返到公司,佢即刻話,蔡生,點會叫我蔡生,由細睇到我大,佢好唔滿意,佢知我打電話俾大老闆。林憶蓮都問過我,我叫佢做阿妹,佢話阿哥你做咩事,當時做緊東京音樂節,見我神不守舍,我話俾佢聽,我知呢件事得罪咗Tony Lee!之後有一個晚上,陳家瑛同我講,佢本身同Tony Lee好熟,佢話Tony Lee話你冇得做,其實暗示咗俾我知。」

得罪高層,還有失戀一役,令蔡楓華為情自殺,他今天笑言:「好傻仔!」他說當年已經與女朋友訂了婚,卻出現第三者,「其實唔可以講係女朋友,老婆嚟㗎,只係未註冊。我同佢青梅竹馬,後期我發覺佢有第三者,當時我好痛苦。我要奉勸依家啲人,當你一段感情要結束,就瀟灑啲結束,我就係唔夠瀟灑。我同佢嘅關係同居咗好耐,依家我講唔怕啦,我都唔係偶像派。我曾經對佢講,邊個人出賣我,我都唔緊要,但係瞓喺我隔離嘅人出賣我就最傷心,呢個對我打擊最大!我同佢訂咗婚,嗰時唔得㗎(曝光),依家抱住十個仔都可以做偶像派!」當時阿倫不是都有個莎莉?「你問莎莉,人哋喺紅館問佢,你係譚詠麟邊個呀?莎莉會講咩?我唔識譚詠麟㗎!你做唔做得到?劉德華都係啦,係人都知朱麗倩,咁多年都唔出聲,直到有咗個女之後!依家冇所謂啦,但係我個時代唔得㗎,一個偶像派嘅人,唔好話有老婆,女朋友都唔得,你諗下我嗰個會幾痛苦!」

從來冇借人錢欠債

whatsapp-image-2023-05-03-at-6-04-38-pm-8蔡楓華說,之後被封「四大癲王」更是打擊,「剎那光輝」只屬「小兒科」,「四大癲王絕對俾人屈㗎,我根本冇精神病,我阿嫂係精神科護士長,如果我精神有問題,我搵佢咪得!好荒謬嘅事,我用實際工作去否定咗,包括埋你所講剎那光輝嗰件事!我依家努力工作、努力開演唱會,冇一個人會係精神有問題,可以去做演唱會,最近我先入紙紅館,但唔批我場,今年full晒,攞唔到期,但我都會再入紙!」

「光輝」完亦「瘋癲」過,蔡楓華如過山車的人生,至少到今天依然在唱,「唱好我嘅歌,我要做實事,去破除人哋寫我唔好、或者講我唔好嘅嘢。一個做實事嘅人,我啲謠言咪不攻自破囉!」有遇過雪中送炭的圈中人嗎?「我鄭重聲明,我從來冇要人接濟,亦從冇去借錢。無論我環境幾差都好,我都唔會同人哋借錢,亦冇欠人債。經濟上,我一向都有啲積蓄,將來呢,一路一路我會推返上去,希望盡快喺紅館同大家再次見面!」

whatsapp-image-2023-05-03-at-6-04-38-pm-11 whatsapp-image-2023-05-03-at-6-04-38-pm-12一日未斷氣,一日都要唱下去,62歲的蔡楓華說:「好多都係六字頭都仲活躍緊喎,可唔可以唱多十年八載,得㗎喎,你睇下修哥就知啦,胡楓修哥話俾你聽,從影幾多年呀,七十年喎!我覺得如果仲有人聽我、仲有人睇我,點解我唔做落去呢?」嘗盡人情冷暖,蔡楓華說,做好自己,是對待仇人的最好方法,「佢見到你好,如果係你嘅朋友,當然恭喜你啦,但係如果仇家或者敵人,佢哋會覺得不是味兒。我個人就係咁,你愈睇唔起我,我個心就愈好!」有真心想多謝的圈中人嗎?「好多,汪明荃小姐、肥姐、陳曼娜Manna姐、張耀榮先生,曾經喺我低潮時候,都叫做鼓勵過我!」

問蔡楓華現在有女朋友嗎?他對記者笑說:「你有冇好嘅介紹俾我?有好嘅就介紹俾我!我唔會諗結婚呢樣嘢,啱嘅咪喺埋一齊囉,一紙婚書係啲乜嘢!」一個人不覺得孤獨?「我唔覺得喎,依家好充實,我自己鍾意音樂,又鍾意彈結他,成日去搵啲靚結他,有得賺喎,結他升值㗎!」價高就賣,結他比人可靠。

 

場地提供:COSMOS

 

 

 

MIRROR 姜濤 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹