英皇新簽的00後唱作新人曾傲棐（Arvin）昨日（13日）推出處男作品《FM520》，由Jay Hong、INDY、Jaykick作曲編曲、陳詠謙填詞、廖志華監製，是一首sweet到爆的R&B小情歌。
出道作是關於「五種愛的語言」，包括甜言蜜語、全程望着對方的精心時刻、禮物時刻、服務行動及令人心跳的身體接觸，典形水瓶座的Arvin坦言，是一個很需要跟別人傾偈的人，「歌名『FM』就係stands for『frequency modulation』，希望喺愛情入面可以搵到一個同頻率嘅人，唔使講好多嘢，已經勝過千言萬語。」Arvin說今次收到陳詠謙的歌詞時已十分喜歡，覺得充滿自己「吹水佬」特色，「呢隻歌當然係一隻好sweet嘅歌，但有啲位例如歌詞『然後扮演小魔星』又或者喺演繹嘅時候，我都會比較偏向用自己一啲百厭唱法去表達俾大家聽，希望大家可以了解多啲我！其實我有時候係一個冇厘正經嘅人，就算追女仔，我都唔會一本正經，反而講好多廢話。」
Busking出身的他，最初不太習慣於錄音室錄音，需要時間掌握busking與錄音在技巧上的分別：「一開始覺得自己係零，諗太多點樣呈現監製要求嘅效果，而變得綁手綁腳。好多謝監製廖志華提點，同埋其實有啲take我哋過咗，但喺錄音室嘅時候，我哋就覺得如果想行遠啲就要再做得好啲，我就同華華講『你唔好放過我呀！你覺得有少少唔得，就算啲音可以執到，你都俾我唱多take啦！』」
MV中，Arvin飾演一個來自外太空其他星球的人，在他乘坐的太空船內，有一個通訊裝置，他不斷調頻看看有沒有其他人可以跟自己對頻，「好好彩同到一個地球嘅女仔synchronize咗，通到話，我就嚟到地球，接埋佢一齊向着我哋未知太空嘅旅程進發，就好似大家搵到自己啱嘅另一半，喺未知嘅愛情入面探索唔同可能性。」首次拍攝MV，面對多部攝影機的Arvin坦言十分緊張，「一路以嚟就算唱歌都好，都係自己匿埋喺屋企衣櫃度錄歌，哈哈！第一次有啲緊張，好驚阻住人收工！」除了面對鏡頭，拖女仔手亦令他大為緊張，「好耐冇同人拖過手啦，呢個MV雖然唔算多親密接觸，但係第一次拍MV就要拖女仔手，係有啲緊張！」
為處男作品加緊宣傳，昨晚（13日）Arvin就擔任網上音樂平台嘉賓，並為主持湯米（米爺）送上大驚喜。由於米爺於早前的音樂擂台比賽落敗，所以需要做一次音樂擂台替班，於是他便找來Arvin拍檔，由於每次上音樂擂台的歌手藝人都會送上禮物，Arvin得知伍詠薇是米爺的女神，所以便特別訂造了一個伍姑娘的人形紙牌送給米爺。
進入唱歌環節前，Arvin搬出「伍姑娘」讓米爺親自「開封」，開封見到伍姑娘後，米爺立即呆在當場，定一定神後便說：「你好有諗頭喎！你好有feel喎！」然後一直望着伍姑娘，Arvin笑道：「你望吓我啦，你唔好淨係望住佢！」Arvin表示有叫過伍姑娘上來，米爺難以置信，「你真係有問過，咁癲？」他坦言沒想過有人會將自己的說話放在心上，「有一段時期係好仰慕伍姑娘㗎！我真係好多謝你呢份禮物！多謝你！」昨晚Arvin共唱了十多首歌，不少網民都大讚Arvin，「新人金等你」、「果然真係好勁」、「耳朵一秒懷孕」、「已沉粉」等。