Advertisement

肥媽李鼎打大佬|肥媽賭城登台最豐收一場逗6位數利是 游嘉欣儲夠400萬夠退休?

本地
2024.01.21

13

由肥媽、李家鼎(鼎爺)及游嘉欣(游游)擔任主持的飲食節目《肥媽李鼎打大佬》,本周兩老除了繼續捉住游游痛腳玩針鋒相對大放笑彈,還繼續大派花生。

明晚(22日)及後晚(23日)一集主題分別是「退而不憂全攻略」及「一團和氣闖年關」。談到理想退休年齡,肥媽鼎爺與游游出現頗大分歧,面對永不言休的肥媽與鼎爺,游游竟笑言想40歲左右退休,嚇到肥媽眼都凸:「咁咪即係唔使做?你諗住吊金龜算喇?」之後肥媽追問游游認為一個月多少「使費」才足夠,游游講出約莫數字後,肥媽更為愕然並大讚游游「娶得過」!之後肥媽再追問游游:「你認為幾多錢先夠退休?」游游天真地說:「假如我40歲開始唔做嘢,假設自己活到80歲,咁我仲有40年人,我估要400萬?」兩老聞言即大呼「冇可能」,豈料游游反而更為愕然:「400萬都唔夠?」當見識到游游「數口」有多不濟後,肥媽即一句KO游游是「食爺飯,著乸衣」(意指靠屋企人),游游聞言一臉慚愧:「都係嘅,同屋企人一齊住使費比較低!」

因為錢銀觀念欠奉,游游在節目中連番被追擊,本着「好學」精神向兩老請教儲錢大計,肥媽鼎爺即大方分享老一輩的「慳錢經」,肥媽說:「以前阿媽教我哋,一出糧就要買金戒指,幾薄都好。咁到年尾就有12隻,夾埋就可以換隻大啲嘅(戒指)。」鼎爺則認為最緊要識忍手:「例如我鍾意嗰樣嘢,我依家唔夠錢,我就下決心捱多兩組(戲),儲多啲(錢)就買到㗎喇。」肥媽聽畢即大爆自己當年辛苦儲錢買完一樣「恨咗好耐」的心頭好後,反而跌入困局的趣事,說時更忍不住扁晒嘴,場面搞笑。肥媽與鼎爺還追加分享「襟撈大法」,肥媽說:「要抵得諗咯!人哋叫你做嘢唔好問幾點收工,要做多過自己嘅本份。」鼎爺則以胡楓修哥做例子,着大家無論甚麼年紀,工作最緊要識Enjoy,並揚言做得演員,有一件事絕對不能介意!

至於後晚一集,肥媽與鼎爺除了大講農曆新年傳統及習俗,肥媽還自爆花生指數極高的新年開騷逗利是秘技,並分享「賭城利是戰衣」必勝法是V領設計及兩個胸圍,肥媽續指最豐收一次是一場穩袋高達六位數「利是」,肥媽說:「(兩個胸圍)係用嚟攝籌碼,唔係攝利是!佢哋啲籌碼成五千蚊美金一個,若果唔戴兩個胸圍,有機會跌鬼咗。」愛吃花生的三人,又大爆「藝人利是秘聞」,肥媽爆出因為一個原因,很少人夠膽埋鄭裕玲身逗利是;至於游游就透露有傳聞指家燕姐的利是有神秘力量‥‥‥

姜濤 星級企業大獎2020 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹