Advertisement

肥仔食減肥餐瘦身 自嘲ERROR玩完 諗計要留住香港人觀眾|ERROR肥仔專訪

本地
2023.12.15
撰文:文嘉龍攝影:洪志富

%e8%82%a5%e4%bb%94whatsapp-image-2023-12-13-at-3-31-21-pm-2ERROR肥仔(梁業)瘦了。訪問拍照時,宣傳大員都對他說:「塊面尖咗!」肥仔卻說比起早前最積極減肥時,體重反彈了少少。出solo新歌,靈感又從減肥而來,肥仔說比起出道時,肥了30磅。肥人有肥福,最近他被黎明邀請成為其演唱會舞蹈總監,肥仔視為人生成就解鎖。

成軍5年的ERROR,肥仔可愛又老實,坦言團隊熱潮已過,「我哋成日話,ERROR最高峰係《愛情值日生》,期間大家封晒關,大家都留意香港娛樂圈,已經達到最高峰,我哋冇㗎喇,ERROR玩完㗎喇依家!」大笑一輪,認真說:「要諗點樣可以留住香港人嘅觀眾!」

臨近年尾,ERROR肥仔再推新歌,《Jap Jap》靈感源自「食嘢」的「Jap Jap」聲,亦是打拳出拳的聲音。肥仔說,早前為了減肥,經理人曾帶他去學打泰拳,過程辛苦又搞笑,「如果有恆心去打就有好大作用,但我發覺都係有啲辛苦,開波做下熱身,跟住開始踢沙包,後尾做體能,教練會攞個波係咁省你個肚,練習抗打能力,做完呢堆嘢,已經攰到暈低!」

打拳辛苦,不如睇營養師食減肥餐單,肥仔瘦了4KG,「永遠減肥最辛苦都係頭一個禮拜,因為平時已經習慣個食量,總之你發覺肚餓,食菜囉,真係餓得滯,營養師會介紹有啲咩零食可以食。當你知自己要出新歌拍MV,好似肥得滯喎,減返啲好,動力就會強啲,或者知自己要on show時候又再減下!我之前168、生酮飲食都有試過,普遍方法都有試!」目標?「減返去啱啱出道前囉,我出道最肥高峰,我肥咗30磅!」

肥仔搞笑說,「我哋研究過,點解突然間整體ERROR,成隊人都肥咗?發覺我哋係拍《花姐ERROR遊》,大家係咪開始食完蟲呢?個人基因改變咗,容易吸收啲呢?我知點解,唔係容易吸收啲,係發覺食完蟲,唔得呀,好辛苦,點解要食呢啲咁嘅嘢,跟住放午餐嘅時候,我哋成日會去日本餐廳食,我哋食返夠本,一定係嗌薯條呢樣嗰樣,總之彌補返自己心靈創傷,成日迫你食蟲吖嘛,再食返多啲嘢囉!」

最respect黎明一樣嘢

不過肥人有肥福,最近肥仔的人生成就解鎖,是獲黎明邀請為其演唱會擔任舞蹈總監,肥仔說知道消息的一刻,內心的小鹿亂撞難以形容,「呢件事對我嚟講,係一個天跌落嚟嘅餡餅一樣,唔知點解突然間會發生呢件事!我第一次見到黎生係點呢?我一個音樂監製T-Ma,黎生咁啱喺嗰度拍嘢,我上去搵我監製,跟住撞到打一聲招呼,禮貌基本嘢啦,後尾過咗一陣,黎生助手問T-Ma攞我電話,我開頭諗,會唔會黎生有歌想搵我玩呢?原來話想搵我排舞,成個騷喎,我心入面小鹿亂撞嘅moment,係咪真㗎?呢個電話係咪詐騙電話㗎!心入面好開心,你會發覺辛苦咗咁多年,有人識欣賞,有人仲肯搵你,嗰個感覺係好好!」

whatsapp-image-2023-12-13-at-3-20-13-pm-14 whatsapp-image-2023-12-13-at-3-20-13-pm-13肥仔說開頭覺得大壓力,「唔知黎生係點呢?後尾同佢開過幾次會,其實佢個人都幾有趣!」黎天王「坐喺度唱快歌」,不用編他的舞?肥仔話:「佢都講到明,我真係坐喺度唔跳嘅,呢個先係我最respect佢嘅一樣嘢!我喺演唱會期間,我特登睇返佢以前啲演唱會,其實黎生本身係跳得勁,所有嘢都係行得好前,佢隻腳踢到咁高㗎喎,企返直係踢到個人咁高㗎,佢依家就輕鬆開心玩,自己hyper嗰種跳法,但係佢以前真係好勁!」有冇說服黎天王跳返part?肥仔搞笑話:「我都係做細,我都唔敢,你知啦,呢單嘢唔係我跟開,我唔好越權!」黎明滿意編舞效果嗎?「如果天王都OK,我冇嘢好講㗎啦,佢成日笠頂高帽過嚟俾我,話呢樣嘢如果唔係得你排,我都諗唔到第二個排到,我就話唔好咁講,其實我心入面好開心!」說到黎明的金句,肥仔表示,「坊間大家都覺得,黎生講嘢好玄妙,好多金句,其實佢個人好有道理,佢用佢人生咁多年經驗,去解答返你一啲問題,可能你未到嗰個level你未明,我當中都消化咗好耐㗎!」

快將34歲的肥仔,由18年參加《造星》入行,到組成ERROR出道,肥仔其實唱得又跳得。他說,要不是參加了《造星》,本身為跳舞老師的他,好大機會去了做和音,「我有個planning,嗰時好興Bruno Mars,佢隔離啲和音都會跳埋唱埋,我本身同幾個friend一齊去學點樣做和音,可能寫份proposal俾啲唱片公司,我哋都可以做呢樣嘢,睇下係咪有興趣用我哋,我覺得可能係其中一條血路。」又唱又跳的和音做不成,結果憑ERROR殺出另一條血路。

成軍5年的ERROR,肥仔的小總結是:「出道咗五年,好多人都話,每年都要突破,但係有好多嘢唔到你控制,我哋成日話,ERROR最高峰係《愛情值日生》,突然間突破唔到,因為嗰種傳唱度,大家耳熟能詳,期間大家封晒關,大家都留意香港嘅音樂、香港娛樂圈所有嘢,嗰個已經達到最高峰。我哋冇㗎喇,我哋ERROR玩完㗎喇依家,哈哈哈!」似是說笑也認真,肥仔再說,「真心依家,大家開返關,好少留意本土嘢,呢個係一個趨勢,even香港依家好多各行各業,生意都差咗好多,因為大家抑制得太多嘅時候,你就想衝出去另一個地方,但係我哋就要諗一樣嘢,我哋點樣可以留住我哋香港人觀眾,呢個就係其中一個環節!」諗到未?「未諗到。吹梗係咁吹!我希望用ERROR嘅團綜,吸引返大家留返喺度!一個人力量有限,依家ERROR最深入民心,大家鍾意睇我哋節目,希望呢樣嘢俾大家留意我哋!」

冇人當我哋係歌手

whatsapp-image-2023-12-13-at-3-20-13-pm-12問肥仔有否不甘心,觀眾只當他們為騎呢搞笑組合?「冇乜人當我哋真係歌手,even我哋有人solo,好多人都唔當我哋係歌手,只會當我哋出嚟搞笑,even啲歌都係開心玩嘢,其實我哋有時啲歌偏向fans,愛情觀未必一定係每個人親身經歷,我哋一啲錯嘅愛情觀,更加唔啱,對於普通觀眾未必好touch到佢哋,或者佢哋覺得我哋真係出嚟搞笑,但我希望下年或者呢幾年,其實我哋做音樂都好認真去做,希望大家留意下!因為我唔明一件事,點解你會睇我哋綜藝,而唔聽我哋啲歌呢?呢個係一個好奇怪諗法,除非你真係開到名,話真係好難聽,咁我認囉!」

五年間四兄弟仍然一條心,只要四個人聚在一起,必定話題不絕,「你唔好睇小佢哋,佢哋說話技巧能力都係強到暈低,以前保錡最多廢話,但依家佢好鍾意講經,保錡最屈機係咩呢?佢永遠嗰啲瘀嘢,一定攞出嚟翻兜,一定鞭屍!你見阿Dee啲IQ題,每次都俾佢鞭,依家諗到一個新嘢,佢話,喂,唔好講屎呀,講屎冇fashion嘢做呀,哈哈哈!」

說到即將舉行的元旦《叱咤》,肥仔說ERROR四子一定會出席,「我哋希望唔係由台上面行落嚟,係由台下面行返上去,年年都係咁講,但係年年都坐喺下面,但最勁係咩呢?我哋冇獎攞,唔知點解,次次啲記者都走去鞭我哋屍,點呀你哋?今年都冇獎攞,可以點呀?其實我哋都好尷尬,都冇獎攞又要叫我哋鞭屍,好,照做訪問!」其實肥仔最想可以接多些騷,有機會在台上表演,他坦言:「我哋演出機會唔多,尤其我屬於跳唱型歌手,更加需要live show,把刀唔落戰場殺敵,總會有生鏽一日,我唔希望我生鏽嗰一日先出返嚟囉!其實我諗過,ERROR咁多廢話講,做主持再加埋唱歌,乜都做得,結婚司儀我都肯做,價錢可以商議,平啲啦,人氣跌咗都要收返平啲!」肥仔有價講㗎!

化妝:Yumi Cheung@Annie G. Chan Makeup Centre
髮型:Harris Lai@CHIC Private I salon
造型:Calvin Wong
服裝:Carhartt,adidas Originals
場地:No Work On Island

星級企業大獎2020 聲夢傳奇 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹