Advertisement

老婆3月預產期 陳柏宇開騷迎接囡囡出世

本地
2023.01.20
撰文:文嘉龍攝影:洪志富

whatsapp-image-2023-01-17-at-5-44-44-pm-16 whatsapp-image-2023-01-17-at-5-44-44-pm-3陳柏宇(Jason)下月初在亞博開騷,組成「陳柏宇feat.九龍搖擺俱樂部」期間限定組合,將歌曲重新編曲再演繹,配上40人管弦大樂團,近日積極備戰,連農曆年都要閉關練兵。老婆符曉薇(Leanne)去年10月宣布懷第二胎,今年3月尾預產期,兩人都笑言,4歲女兒Abigail竟然是最期待新成員的來臨,已經準備好當一個大姐姐,「佢依家要人叫佢做大家姐呀!」

近日陳柏宇接連有喜訊,成為首位香港歌手登陸日本大型音樂平台《THE FIRST TAKE》,將《你瞞我瞞》重新演繹,本周一晚(16日)正式在YouTube上架,影片上載一日已破百萬點擊。除了衝出香港,陳柏宇近日亦為下月4日,於亞博舉行的演唱會積極備戰,他笑說「歌詞mon」是少不了的,「開始盡背歌詞,但最重要都要有歌詞mon(提詞器),因為唔想將背歌詞變成一種壓力!」今次與「九龍搖擺俱樂部」組成限定組合,再加上40人管弦樂大樂隊,在演唱會舉行前更破天荒搞了「公投」,由樂迷投票選唱歌曲,近日投票進入直路,將誕生十強,暫時依然以《逸後》位列第一。

一家三口過年前接受訪問,囡囡Abigail精力十足在現場周圍走冇時停。說到「你投我唱」,家人當然支持,老婆Leanne原來都有投票,不過她就笑言沒有上榜,「我投《路人乙》,因為我想聽佢唱《路人乙》現場版。佢不嬲唱腔都係好高音,呢首歌係特別低音,嗰時我覺得佢未carry到呢個低音,我想知佢依家學咗唱歌會點唱!」至於囡囡,則不是爸爸的歌迷,陳柏宇說很少讓囡囡聽自己的歌,「我冇刻意去俾佢聽我嘅歌,佢聽返啲小朋友歌居多,一啲佢可以明白理解嘅嘢,循序漸進。」大個女,先聽爸爸的情歌都未遲。

為演唱會作準備之餘,陳柏宇更重要是迎接家中新成員誕生,3月將再添一個小女兒。今次的第二胎得來不易,老婆Leanne曾試過宮外孕,要接受緊急手術切除左邊輸卵管;前年亦發生過腹中胎兒患上愛德華氏綜合症T18,只好忍痛接受人工流產,終於在去年10月再度宣布懷孕喜訊,陳柏宇說:「我反而覺得今次冇咁小心翼翼,我覺得都合理,當心態放鬆嘅時候,到現時為止都幾順利。」Leanne則說:「今次係興奮開心,但係嗰時自己中咗COVID,哈哈,所以同時間又興奮又緊張。我經歷入面,所有嘢都好似係一個緣份,整定,放鬆啲囉!」

放低咗心頭大石

whatsapp-image-2023-01-17-at-5-44-44-pm-1 whatsapp-image-2023-01-17-at-5-44-44-pm不過說到最期待新成員的來臨,是4歲的Abigail,成日都問住爹哋媽咪「幾時到3月」?Leanne說:「佢好早知,成日都問妹妹幾時出嚟呀?我要去照顧妹妹,乜嘢佢都話照顧好晒!佢依家唔俾人叫佢做BB,佢依家要人叫佢做大家姐呀,哈哈!好似有一次食飯,我話小朋友要坐中間,佢係都要坐側邊,佢話我已經唔係小朋友,我係大家姐嚟㗎,哈哈!佢已經好有呢個姐姐心態!」

可愛精靈的Abigail早已是網上紅人,現時IG擁5.2萬粉絲,早前陳柏宇就首度父女檔上陣,為銀行樓宇按揭拍攝廣告,問到覺得女兒有否演戲天份,陳柏宇就話:「冇,哈哈,佢太笠水依家!天份呢啲嘢,佢依家鍾意音樂,第日就一定唱歌呀?完全唔係囉,因為佢啲興趣會變,依家4歲,性格上可能唔會變,但表達方式唔同,譬如依家你問佢,想唔想踢波,如果佢唔想,你點都要佢揀一樣運動興趣班,佢做,係咪俾佢長久做落去呢,又唔係喎,因為都好三分鐘熱度,可能做兩個禮拜,佢又話俾你聽,唔想。」4歲Abigail現時最愛唱歌跳舞,媽媽說她踢波只會「守龍」,「佢守龍門,你叫佢射波、帶波,佢就麻麻地;你叫佢演(戲)就唔得,因為佢講唔到對白,因為佢暫時未有嗰個mindset去講對白,你一叫佢講嘢,佢就會細細聲咁講,又唔望下鏡頭,但係叫佢影相,佢好OK亦都好鍾意!」

whatsapp-image-2023-01-17-at-5-44-44-pm-2 whatsapp-image-2023-01-17-at-5-44-44-pm-19新一年迎接兔年、迎接兔B女。問到過去一年最開心的事情,Leanne說:「最開心就係有BB,同埋Abi有間心水學校收咗,我哋唯一想佢讀嘅國際學校收咗佢!」陳柏宇說:「放低咗個心頭大石,同一時間亦都捧起咗一嚿全新嘅心頭大石,哈哈!因為學費好貴!」

去年11月一家人去泰國旅行時,才收到學校通知,「突然之間收到email,星期五你要交片,即刻好倉卒喺泰國剪、喺泰國拍,因為我哋插班入去,本來想小學先入去,我哋經agent話,愈早報愈好,K2就插班上去,只收20個,可能成千人報名,淨係收20個,好好彩!」如願以償入讀心儀國際學校,因為陳柏宇在加拿大接受教育,一早希望女兒都可以有外國教育的體驗,Leanne說,「佢(陳柏宇)以前喺加拿大讀書,老師知道佢好多嘢講,反而每日都俾佢一個時間講嘢,講自己嘅生活,我覺得就係一個分別囉!」陳柏宇說:「俾我分享下我尋晚睇過嘅卡通片,好好笑!佢知你鍾意講嘢,佢俾機會你去講嘢,去develpo你呢個講嘢能力,而唔係suppress(壓制)你嘅興趣,所以國際學校、外國教育模式就係有呢一樣,我鍾意嘅!」

忙完演唱會,再待小女兒出世後,一家四口將會飛加拿大,探望已經幾年冇見孫女的嫲嫲,「等佢幾個月(細女出世後),我哋諗住天氣冇咁凍,佢(Abi)又放暑假!冇見幾年喇!」到時真正的一家團聚。

化妝:Jessica Chan
髮型:Alex So@The Attic
服裝:YSL、Lane Crawford
造型:Kay Pang
場地提供:Studio Meta

陳卓賢 MIRROR 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹