Advertisement

獲舉辦展覽預祝42歲生日 張敬軒額外珍惜歌迷的愛

本地
2023.01.28

faye0506

下周三(1/2)是張敬軒的42歲生日,由於已多年沒有跟朋友或歌迷慶生,今年一眾歌迷為給他送上驚喜,自發性地於九龍灣展貿中心舉行展覽,為他預祝生日。

現場佈置除了有多張軒仔的巨型靚相,歌迷更將他於賀歲片《超神經械劫案下》中的角色「有成」製作成蛋糕,非常有心思。軒仔到場前,已有千多名歌迷於場內等候,迫爆九展。而當軒仔到場後,歌迷的尖叫及歡呼聲震耳欲聾,撼動全場。期間有歌迷點歌,希望軒仔可以唱《賽勒斯的愛》,軒仔爽快答應,在毫無預備的情況下,即興清唱一曲送給歌迷,唱畢後,歌迷亦十分識做,即來一個全場大合唱《櫻花樹下》作回禮。

faye0391
軒仔表示十分多謝大家於過去一年,無論在他的音樂、演唱會及對這次電影的支持,「有時我自己啲歌,演唱會唱得唔好,自己嘅歌做得唔滿意,甚至乎呢套戲有沙石嘅地方,但我呢班fans都好努力去撐我!呢啲係我嘅福氣,所以我好感恩。呢個世界有咁多人、有咁多出色嘅artists,但大家選擇嚟follow我、支持我,好多謝大家。」軒仔又認為人生有很多階段,人大了,慢慢知道人生當中並非所有事情都是應份,因此會額外珍惜,「買我歌迷會嘅product、我嘅唱片、演唱會飛,每一張飛我都知道係你哋生活入面,無論你哋嘅經濟狀況如何,但嗰個金額都係你哋生活日常開支嘅一部分,所以我好感恩大家可能買少咗一件自己嘅心頭好,或者嗰個月慳啲錢去睇我個show,去support我,所有呢啲情意,我都會永遠擺喺心入面。不過有時因為好多情況,冇辦法同每一位朋友影相、簽名,或者傾好耐,但希望大家知道張敬軒心入面係有呢份感情。」

軒仔一向不愛過生日,坦言這一次特別想,「三年疫情我開咗三次演唱會,中間都有好多阻滯,但每一次重開,大家嘅氣氛同支持都會加倍,所以好感恩喺呢三年疫情入面,大家喺網上又好、喺各個場合大家俾我嘅support。見到好多新面孔嘅加入,希望大家知道自己喜歡嘅係一個乜嘢人,好似交朋友咁。我成日覺得我同我嘅fans有心靈上嘅交流係好重要。有時我唔係成日出嚟,或者有時唔喺香港,但大家喺生活當中,張敬軒都會起到一個支撐嘅作用,精神層面又好、心靈層面都好,我與大家同在嘅,多謝大家。」

faye0607

星級企業大獎2020 聲夢傳奇 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹