Advertisement

獲千名歌迷陪度50歲生日 楊千嬅真情流露分享情緒問題 「CD碎到一地都係,個心好痛」

本地
2024.02.04

 

whatsapp-image-2024-02-04-at-18-09-49-11

楊千嬅昨日(3日)踏入50歲,人生半百大日子,她選擇了與歌迷會一起度過,辦了一個近千人的《MEET YOU AT THE HALFWAY MINI CONCERT 生日限定》大派對,除了選唱了不少平日少唱的歌,讓歌迷驚喜萬分之外,亦把自己這幾年的經歷及心路歷程公開,用作鼓勵所有愛她的朋友,希望大家於人生面對困難時要學識不要放棄自己。

whatsapp-image-2024-02-04-at-18-09-49-6

昨晚千嬅正日生日,因為早前不少歌迷提出要求希望跟她慶生,於是她很短時間內,用了兩星期急趕籌備是次生日會,她在台上說:「我係香港出生長大,我一早決定50歲一定要係呢度同家人及朋友過,好多謝你哋陪我過呢個生日,我真係冇諗過,自己唱歌會唱到半百,哈哈….除左感恩、感激,呢段咁長人生路程,回頭望係非常精彩,亦從沒遺憾。今日來得嘅朋友,我知你哋已經係我家人, 感謝你哋多年來選擇咗我,聽住我嘅歌,同我一齊成長, 我好耐冇係香港表演,我唔想喊呀,喊完鼻涕又變痰,唱唔到好唔抵,哈哈。」

whatsapp-image-2024-02-04-at-18-09-49-7

繼而千嬅再唱出《偷生》《嬅麗緣》《我是羊》《稀客》等歌,又再同歌迷分享心底話:  「呢幾年你哋過得好嘛?我知大家走過唔同經歷,都一定係非常之唔容易,我自己都經歷咗好大考驗,相信大家都目測到我嘅過程,感謝曾經好擔心我嘅朋友,你哋唔駛擔心我,我過得好好!係、過程係好唔容易,但係我終於知道,楊千嬅出生就係要學識解決問題,我發現我回望人生,我都係笑比哭的多,都係開心嘅人生。 過去嘅日子,經歷高山底谷,得到好多養份同智慧,我今日好想分享比大家聽,之前嗰幾年其實都幾難過,你見到我唔係好出嚟,躲埋咁耐,時肥時腫,比人影到畸形樣,哈哈哈……新時代網絡風暴係一個好震憾嘅經歷,我乜都遇過晒, 幾十歲人我同自己講,有咩未見過? 真係低處未算低,當我經過呢段日子,我發覺自己真係好強大,今日好感恩,上天比我係有力氣時,經歷呢個浩瀚人生。」

whatsapp-image-2024-02-04-at-18-09-49

她又真情流露同大家分享情緒問題,「低潮嘅情緒係無色無味,當人負面時,要容許自己唔開心,我都試過死頂,唔想俾人知我唔開心,刻意扮開心個陣,嚇親好多人,大家好擔心我,個一刻我又迷惘又唔知發生咩事,好困擾。尤其見到自己啲音樂,CD碎到一地都係,個心好痛,我連朋友都唔敢再關注,你鬧我冇問題,唔好鬧埋我啲朋友,諗住一個人撐唔好害人,曾經我覺得好恐怖,所以首先選擇熄機,唔好睇唔好理,唔好聽,休息啦,比自己時間消化。我點企得番起身?係你哋俾咗好多力量我,你哋好多人PM我,俾好多鼓勵我,其中有一個歌迷,佢將我多年來上台講得獎感受的說話,剪咗幾分鐘片比我,好似成三分幾鐘,我一路睇一路喊, 原來我同人講過嘅嘢,曾經幫到人,最後今日幫返我自己, 我發現困難時只有係自己救自己,唔好放棄自己。今日我想同愛我嘅人講,希望你記得,面對任何困難,記住有心跳就有希望,唔好放棄自己。我希望你哋可以愛自己,要有健康身體,永遠面對挑戰最高難度時,加油提升自己嘅能量,遇到最壞最唔開心嘅事,都係可以逆轉, 入得呢個會,有番咁上下POWER,我進化你哋同我一齊進化,一齊進步!呢個係『千嬅群英會』嘅精神,我五十歲都做到,你哋咁後生,你哋可以活得更精彩!重點放係當下,記得所有人對自己的美好,好好珍惜愛你嘅人 ,照顧好自己,咁先可以繼續做自己想做嘅事。 大家聽住我嘅歌,就可以似我保養得自己得咁好。」全場歡呼拍掌時,千嬅再笑指,「我唔係話保養得好個樣,我係話呢度,個腦。」

MIRROR 姜濤 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹