由黎諾懿及陳敏之化身「爸知弊幼稚園」校長及副校長，考驗四大藝人家庭爸爸代表的節目《爸知弊！你嚟湊吖！》，本周節目嘉賓林子善大派洋蔥，敏之更自爆喊到眼睫毛都甩埋，十分誇張。子善「屈機」程度令校長黎諾懿亦大叫投降，並指要嚴禁太太Nicole收看：「我驚我老婆睇完之後會話：『你學下子善得唔得㗎，適當時候要講我愛你呀！』」
製作組為子善炮製長達30分鐘的「與B同行體能之巔」，子善在30分鐘內必需抱住女兒乖乖進行各項體能考驗，當中以「人肉過山車」最惡啃，子善除要將乖乖連人帶籃hold在半空足足三分幾鐘，更要不斷模仿過山車上上落落及持續震動，enjoy到爆的乖乖興奮得連環尖叫。
另外子善只要見到有危險障礙物，亦定必第一時間為囡囡「鏟除」，暖爸指數爆燈。談到子善是「完美湊女公」，Kary在節目披露背後真相：「奶奶以前做陪月，所以佢細個時會一齊照顧好多BB，（我）啱啱生BB時，好多時都係子善照顧，我就喺側邊學。」坦言最希望老公「唔好成日喊」的Kary，笑言子善連聽兒歌也能聽出眼淚！年僅3歲的乖乖，每次見到爸爸喊，均會主動安慰及為爸爸拿紙巾拭淚。
子善仲自爆最令人搲頭的一次爆喊，是在袁偉豪（Ben）及張寶兒婚禮上：「Uncle拖阿寶兒落嚟，我已經喊到黐咗線，我喊到阿Ben話：『嘩！好似你結婚喎！』」子善續指當晚還主動找張爸爸盡訴心中情。
