Advertisement

照顧資深藝人 提攜後輩 古天樂:依家年青一代諗法好好|封面故事

本地
2024.03.01
撰文:文嘉龍攝影:Alexander Yeung 助理:Kris Yeung 花絮:洪志富

whatsapp-image-2024-02-28-at-5-02-13-pm-9最近常常見到古天樂的身影。車婉婉演唱會,他在台下捧場;鄭中基個唱,他當尾場嘉賓上台大合唱,還有Juno麥浚龍開騷,他人不到也聲演客串一角……這位電影大亨,幾乎圈中人要他幫手,他都有情有義。訪問這天,古天樂也說:「做完呢個訪問,我都要去演藝人協會開會!」做事快狠準,他坦言人生沒甚麼煩惱,「有咩要解決嘅問題,我都好快解決到!」

《尋秦記》電影版有得睇?古老闆會返娘家無綫拍劇?古天樂親解網民4大都市傳說

今年是古天樂入行三十周年,由當年的「古仔」到今天的「古生」、「古老闆」,一路走來當然不易,但是大人物必先有顆「強心臟」,強如古生,步入影樓的氣勢,那種氣場已經懾人。你以為他古肅威嚴,其實很幽默,問他,現在的古天樂仍有夢想嗎?53歲的他答:「去火星拍戲好唔好?」

當你以為古天樂只安守本分做個演員,其實,他早已想得更遠更闊。由當年唇紅齒白的小鮮肉模特兒出身,拍過不少卡拉OK男主角,94年簽約無綫處男演出電視劇《婚姻物語》,拍完經典的《尋秦記》後正式轉戰影圈,今年是他入行的三十周年。現在的古天樂,多重身份,演員、老闆、投資者、演藝人協會會長、香港電影總會會長、收藏家、慈善家……名銜一大串。他說:「電影總會又好、演藝人協會又好,我哋嚟緊會將佢年青化,希望可以吸納唔同範疇嘅人,入去演藝人協會,可能有啲網紅、一啲KOL。因為一班年青人,坐落去度橋先係最快,創意比較高,同埋佢哋比較敢去嘗試。其實你見到,大家可以去睇唔同平台,Netflix、Disney+,又可以去YouTube睇唔同嘅嘢,生態已經慢慢擴闊,唔單止係睇電影睇電視,所以我覺得呢個係一個好大改變!」

說起演藝人協會,大家都會記得這一幕,去年是協會時隔三年、疫情後再次舉辦春茗聚會,當日增設頒發傑出演藝大獎環節,余慕蓮、江圖和黎宣成為首屆得主,余慕蓮上台領獎時喜極而泣,感激會長古天樂對她們一代的資深藝人照顧,場面感人。當晚出席的資深藝人眾多,包括羅蘭、黃夏蕙、馮素波、丁羽、邵音音與張雷等,可見會長古天樂對前輩們的尊重。提起余慕蓮(余毛),疫情時曾診斷患有肺纖維化,住進加護病房,在醫院插管治療半年,問到她的近況,古會長說:「佢依家好好多喇!佢都唔算叫做我哋擔心,因為有啲情況仲差,佢算仲有自我照顧能力,同埋佢都有一班朋友睇住佢,但係其他嗰啲係冇㗎,比較擔心啲!」

古天樂說,資深藝人的感人小故事,多不勝數,不只歌影視曲播舞台的幕前,幕後的無名英雄更甚,「我諗多到,我都冇辦法講到!尤其疫情到依家,我哋呢個圈大部分演員都已經超過六十歲,有啲甚至乎七、八十歲,有啲已經係長期病患,疫情之後,身體狀況仲差咗,有啲選擇退出呢行,有啲獨居,所以我哋都要照顧,佢哋可能未必想去安老院或者護老院,都想返番屋企,所以呢個過程,要去同佢溝通安排;甚至乎有啲例子,佢哋去咗內地居住,但係一有病時,其實我哋都安排聖約翰救傷隊去邊境接佢,接返嚟睇醫生,安排所有嘢囉!」好多這類例子?「我諗一個禮拜都處理兩、三單!」

點解一定要接班人?

whatsapp-image-2024-02-28-at-5-02-13-pm-1其實,有很多並不是我們認識的幕前人,「有時圈內人同我哋講,有啲其實已經患咗失智症,佢哋點會知啫?你問佢,屋企有咩人呀?唔知!有冇儲蓄呀?唔知!佢哋都係我哋前輩,冇理由有事,我哋唔理!你都見到成個圈,我幾大膽咁講,有百分之八十係年紀比較大,唔單單係你哋識嘅,有好多你可能唔識,因為我哋入會規則,只要每部戲end roller,你有兩部戲係有名(出現),就可以有入會資格,所以好多可能係特約演員或者幕後,你唔知㗎!」

有老有嫩。照顧資深藝人之餘,古天樂不忘提攜後輩,單是他旗下,已經有多間分支的經理人公司,佔了娛樂圈一半以上的藝人,都屬他旗下,近年發展得很好的余香凝、袁澧林與廖子妤等,都是很亮眼的新生代。如何獲得古老闆垂青,可以成為旗下猛將?「簽人最緊要一樣嘢,係佢有咩獨特之處俾我睇到,唔係我有咩獨特諗法!依家年青一代,佢哋有時候啲諗法都好好,有啲你以為佢後生,但係演戲演得非常之好!有時又唔一定要簽返嚟嘅,我覺得呢一行,有一部戲角色啱,有時開會都會講,你不如用佢啦,咁先至會百花齊放,唔係話一定要簽我公司先會用,咁當然,簽我公司有優先選擇權啦,但係最緊要幫到下一代囉!」

有沒有接班人心水?古影帝心水好清,「點解要成日咁諗?我真係唔明!一定要接班㗎咩?可能係我跟住佢呢!可能有個天才,突然間出咗嚟,可能係我要跟住佢做嘢呢,做乜要接我班啫?」怕不怕電影圈青黃不接,出現斷層?「唔係斷層,係唔同generation嘅人,諗法唔同呀!我諗每個時代,都有斷層呢個狀況出現,你睇吓當其時最紅嗰個,同啱啱新上嚟嗰啲,永遠都一定有距離,咩叫斷層啫?只不過係諗法同唔同!」

正所謂老闆唔易做,養起這麼多人,壓力大嗎?「當然有壓力,呢個係真事,但反而我覺得呢幾年真係好多人移咗民,佢哋唔想做呢行,咩情況都有,唔單單話公司養幾多人嘅問題,有時你缺失咗啲人才,你都要搵返啲人返嚟㗎,當然有壓力!疫情嗰幾年,咩都停晒,戲院又唔開,呢個一定會產生問題,但係你都要繼續做喎!」

今年的農曆新年,古天樂選擇留港度歲,在家陪伴父母?他笑言:「我諗斷估唔會自己一個人走去深山匿埋嘅!」今年53歲的古天樂,人愈大愈珍惜與父母相處時間?「我不嬲都係!應該咁講,我父母年紀係大咗,當然更加珍惜啦,尤其是過去幾年,冇得去拜年幾年㗎喇,有啲親戚已經走左,所以我覺得更加需要留返喺香港,聚得就聚吓囉!同埋我諗喺香港過年嘅氣氛,會習慣啲!過年有咩做?拜年囉,人去拜年、我去拜年!我唔鍾意賭錢,唔係唔打牌,賭錢我都憎憎哋!」

有想過組織自己家庭的計劃?古生反問:「我同阿爸阿媽,算唔算自己組織家庭吖?未有呢個諗法,有時我見到親戚啲下一代,大家都好擔心啲教育同未來。」永不言休?「首先冇諗過退休,既然都冇諗過,點解唔繼續落去?因為AI推出之後,其實我覺得係一個奇異點,AI改變咗好多新事物出現,我好有興趣,我哋做好多研究,我覺得唔單單係電影,用途可以好闊!」這就是大人物的闊度。

裝置:Ka Wai
造型:Anthony Tong
造型助理:Gaster Chan
髮型:Dan Tam@04
化妝:Carmen Man
服裝:GUCCI、BOTTEGA VENETA、RALPH LAUREN、ALEXANDER MCQUEEN

星級企業大獎2020 MIRROR 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹